Тошкент шаҳрида 11 март куни Шанхай ҳамкорлик ташкилотига аъзо давлатлар ва Эрон Ислом Республикаси ваколатли вакилларининг маслаҳатлашувлари якунлари бўйича протоколни имзолаш маросими бўлиб ўтди. Бу ҳақда Ташқи ишлар вазирлиги хабар қилди.
Қайд этилишича, ҳужжатда Эрон томонининг ШҲТга аъзо давлат мақомини олиш бўйича мажбуриятлари тўғрисидаги Меморандум лойиҳаси маъқулланган. Тадбирда Ўзбекистон ташқи ишлар вазири ўринбосари Владимир Норов, ШҲТнинг доимий фаолият юритувчи тузилмалари раҳбарлари, аъзо давлатларнинг миллий координаторлари, шунингдек, Хитой ва Эроннинг Тошкентдаги дипломатик ваколатхоналари раҳбарлари ҳамда ходимлари иштирок этган.
Ҳужжат Эрон томони аъзо бўлганидан кейин ШҲТ Хартияси, халқаро шартномалар ва Ташкилот доирасида қабул қилинган ҳужжатларнинг мақсад ва тамойилларига риоя қилиш, аъзо давлатлар билан дўстона ва ўзаро манфаатли ҳамкорликни ривожлантириш ҳамда ШҲТнинг халқаро ва минтақавий масалалардаги нуфузини оширишга ўз ҳиссасини қўшишга тайёрлигидан далолат беради.
Мазкур жараённинг навбатдаги босқичи жорий йилнинг сентябрь ойида Самарқандда бўлиб ўтадиган ШҲТ саммити доирасида Мажбуриятлар тўғрисидаги меморандумни имзолаш ва ушбу мажбуриятларни бажариш бўлади. Шундан сўнг ташкилотга аъзо давлатлар раҳбарлари Эронга ШҲТга аъзо давлат мақомини бериш масаласини кўриб чиқади.
Владимир Норов ўз нутқида Эрон 2005 йилдан буён кузатувчи давлат сифатида ШҲТ фаолиятида иштирок этиб келаётганига эътибор қаратган. Мамлакат минтақавий хавфсизлик масалалари бўйича асосий органлар йиғилишларида ва маслаҳатлашувларда мунтазам иштирок этади. Хусусан, Эроннинг ваколатли тузилмалари ШҲТнинг Минтақавий аксилтеррор тузилмаси билан амалий алоқаларни ўрнатган.
«Эрон каби давлатнинг ШҲТга кириши ташкилотнинг ‘географик масъулият’ ҳудудини кенгайтиради, минтақавий ҳамкорликни ривожлантириш учун янги истиқболларни очади. Ташкилотимиз Евросиё маконида кенг трансконтинентал ҳамкорлик сари ишонч билан бормоқда. Бу, шубҳасиз, минтақавий ва глобал кун тартибидаги долзарб масалаларга янгича қараш имконини беради», — дейди ташқи ишлар вазири ўринбосари.
Маросимда видеоконференцалоқа шаклида иштирок этган ШҲТ бош котиби Чжан Минг ушбу тадбирни ташкил этгани учун ШҲТга раислик қилаётган Ўзбекистон томонига, Эронни ШҲТга аъзоликка қабул қилишга қаратилган келишув ҳужжатлари бўйича тизимли мувофиқлаштирилган ишлар учун барча томонларга миннатдорлик билдирган.
Маслаҳатлашувларда сўзга чиққан делегациялар Ўзбекистон томонининг ШҲТга раислик доирасидаги саъй-ҳаракатларини, жумладан, ташкилотнинг халқаро роли ва нуфузини мустаҳкамлаш йўлидаги ишларини ижобий таъкидлаган.
Изоҳ (0)