«Ўзбекнефтгаз»: Инвестицион лойиҳа доирасида йил якунига қадар 1,095 млрд куб метр табиий газ қазиб олиш режалаштирилмоқда

Газ конларини қидириш ва ўзлаштириш мақсадида «Ўзбекнефтгаз» АЖ билан биргаликда бир қанча қўшма корхоналар ташкил этилган. Устюрт ҳудудида геологик қидирув ишларини олиб бориш ва ўзлаштириш ишлари билан шуғулланадиган Natural Gas-Stream КҚ МЧЖ ҳам ана шундай ҳамкорлардан ҳисобланади.

«Ўзбекнефтгаз» АЖ бошқаруви раиси Меҳриддин Абдуллаев бошчилигида ушбу қўшма корхона томонидан айни пайтда «Сечанкўл», «Оқжар» ва «Чимбой» инвестицион блокларида геологик қидирув ишларини олиб бориш ҳамда «Урга» конида, «Оқчалоқ» ва «Чандир» гуруҳи конларида қазиш ишларини амалга ошириш инвестицион лойиҳаси жадал суръатларда амалга оширилмоқда. Ушбу лойиҳанинг умумий қиймати 701,4 миллион долларни ташкил этади.

Ҳозирги кунга қадар лойиҳа доирасида 27 та қудуқда бурғилаш ишлари тугатилди ва 600 квадрат километр майдонда 3D сейсмик қидирув ишлари ўтказилди.

Инвестицион лойиҳа доирасида «Оқчалоқ» конида қўшма корхона томонидан қуйидаги ишлар амалга оширилди:

• 15 та қудуқ ободонлаштирилди;
• узунлиги 78,9 километрни ташкил этадиган газ қувурлари ўтказилди;
• 5,5 километр сув қувури ўрнатилди;
• 40,5 километр  электр узатиш линиялари тортилди.

«Чандир» конида қуйидаги ишлар амалга оширилди:

• 137,7 километр газ қувурлари ўтказилди;
• 81,6 километр электр узатиш линиялари, конни телефон алоқа ва интернет билан таъмирлаш мақсадида 119,8 километр оптик толали алоқа линияси кабели ўтказилди;
• 133,3 километр йўл қурилди;
• 50 кишилик ишчилар шаҳарчаси қурилди.

• «Бухоро-Урал» газ қувурига ўтқазиш учун газни ҳисобга олиш мосламаси барпо этилди;
• 23 кишилик ишчилар шаҳарчаси қурилди;
• 3 та қудуқ ободонлаштирилди;
• 3,1 километр газ қувурлари ўтказилди.

Айни пайтда «Оқчалоқ» инвестицион блокида 1 та қудуқда ён стволини кесиш («Кўкчалоқ» кони), 3 та қудуқни мукаммал таъмирлаш ишлари олиб борилмоқда. «Урга» конида 1 та қудуқни мукаммал таъмирлаш, 1 та қудуқда ён стволини кесиш, 1 та қудуқни гидравлик синаш ишлари олиб борилмоқда.

Бугунги кунга қадар Қорақалпоғистон Республикасининг «Оқчалоқ» конида жойлашган 3-сонли қудуқда газ йиғувчи коллекторга уланиш ишлари амалга оширилди. «Урга» конида 9-сонли қудуқда ён стволини кесиш, 4-сонли қудуқда қатламни гидравлик ёрилиш ишлари олиб борилган. Қудуқларни газ йиғувчи коллекторга уланиш ишлари амалга оширилган.

2022 йил якунига қадар, 1,095 миллиард метр куб табиий газ ва 27,2 минг тонна газ конденсатини қазиб олиш кутилмоқда.

«Ўзбекнефтгаз» АЖ матбуот хизмати