Қашқадарёда туман электр тармоқлари корхонаси раҳбари сифатида ишлаган У.Б. фуқарони ишга олиш учун 400 доллар, тадбиркорга трансформатор ўрнатиб бериш учун 23 миллион сўм олгани маълум бўлди. Бу ҳақда вилоят прокуратураси хабар берди.
Маълум бўлишича, Шаҳрисабз туман электр тармоқлари корхонаси бошлиғи лавозимида ишлаб келган У.Б. фуқаро Д.Э.ни ишга қабул қилиш учун ундан 400 доллар пора олган. Шунингдек, у жиноий ҳаракатларини давом эттириб, фуқаро М.Т.нинг ишончига кирган ва унга тегишли хусусий корхонага трансформатор ўрнатиб беришини айтиб, тадбиркордан 23 миллион сўм ундирган.Жиноят ишлари бўйича Китоб тумани суди мансабдорни пора олиш ва фирибгарлик жиноятларини содир этганликда айбдор деб топиб, уни 2 йил 2 ой муддатга озодликдан маҳрум этган.
Қашқадарёда, шунингдек, жазони ижро этиш колонияси тезкор ходими ҳам 1600 доллар билан қўлга тушган.
«Вилоятдаги 10-сонли жазони ижро этиш колонияси тезкор ходими Б.Ҳ. колонияда жазо ўтаётган маҳкум М.Ю.га енгил шарт-шароитлар яратиб бериш, унга уяли телефон аппарати олиб кириб бериш эвазига 8 март куни 1600 доллар олаётган вақтида ашёвий далиллар билан ушланган», — дейди вилоят прокуратураси масъули.
Қўшимча қилинишича, мазкур ҳолат юзасидан департаментнинг вилоят бошқармаси томонидан Жиноят кодексининг 210-моддаси (пора олиш) билан жиноят иши қўзғатилиб, дастлабки тергов ҳаракатлари вилоят прокуратураси томонидан олиб борилмоқда.
Изоҳ (0)