Президент Шавкат Мирзиёев раислигида саноат кооперациясини ривожлантириш ва ишлаб чиқаришни маҳаллийлаштириш чора-тадбирлари юзасидан видеоселектор йиғилиши бўлиб ўтмоқда. Давлат раҳбари йиғилишда фармацевтика тармоғини ривожлантириш агентлиги директорига ҳайфсан эълон қилгани, иккала ўринбосарини ишдан олишга кўрсатма бергани тўғрисида хабар берилганди.
Президент матбуот котиби Шерзод Асадовнинг ёзишича, йиғилишда бундан икки йил аввал озиқ-овқат саноати Қишлоқ хўжалиги вазирлиги тизимига ўтказилиб, алоҳида вазир ўринбосари лавозими, махсус жамғарма ташкил этилгани, барча ваколатлар берилгани таъкидланган.
Лекин қишлоқ хўжалиги вазири Жамшид Хўжаев ва унинг ўринбосари Анвар Асомов масаланинг ичига кирмаётгани, пастга тушиб тизимда амалий натижалар қила олмаётгани танқид қилинган.
«Озиқ-овқат саноати бўйича бир ой муддатда ўзгариш қилмаса, уларга қатъий чоралар кўрилади», — деди Шавкат Мирзиёев.
Шунингдек, бирорта ҳокимда ҳудудий импорт баланси, ички имкониятлар ва вилоятда ишлаб чиқарса бўладиган товарлар бўйича ҳисоб-китоб йўқлиги таъкидланган. «Бу борада ҳокимлар берган режалар ҳам буни тасдиқлаб турибди. Бу мутлақо етарли эмас», — дейди президент.
Вазирлар Маҳкамасига ҳукумат қарорини қабул қилиб, ҳар бир тармоқ ва ҳудуд раҳбарининг мажбуриятлари, аниқ ҳисоб-китоблар, масъул ва жавобгарларни белгилаш топширилган.
Изоҳ (0)