«Россиясиз мулоқотдан завқланишсин». Россия Европа Кенгашида ортиқ иштирок этмаслигини билдирди

Россия Европа кенгашининг ишларида ортиқ иштирок этиш ниятида эмас, дейилади мамлакат Ташқи ишлар вазирлигининг баёнотида.

Вазирлик нуқтаи назарига кўра, Европа Иттифоқи ва НАТОнинг «дўст бўлмаган» давлатлари Европа Кенгаши Вазирлар қўмитасидаги кўпчилик ўрнини суиистеъмол қилиб, ташкилот ва Европадаги умумий гуманитар-ҳуқуқий маконни йўқ қилмоқда. Ўз навбатида Россия «бундай бузғунчи ҳаракатларга чидамоқчи эмас».

«Россия Европанинг энг азалий ташкилотини (Европа Кенгашини — таҳр.) наточилар ва улар ортидан итоаткорлик билан эргашган Европа Иттифоқи томонидан ўзгартирилиб, Ғарбнинг устунлиги ва ўзини севиши ҳақидаги фитналар учун навбатдаги платформага айлантирилишида қатнашмайди. Улар Россиясиз бир-бирлари билан мулоқот қилишдан завқланишсин», — дейилади баёнотда.

Ташкилот низомига мувофиқ Россиянинг Европа Кенгашидаги аъзолиги жорий молиявий йил охирида тўхтатилади, деди Федерация кенгаши вице-спикери Константин Косачев. Унинг сўзларига кўра, Россиянинг Европа Кенгашидан чиқиши ташкилот Низоми ва Инсон ҳуқуқлари бўйича Европа конвенциясини бир вақтнинг ўзида денонсация (бекор) қилишни назарда тутади. Сенатор Андрей Клишаснинг қўшимча қилишича, Европа Кенгашини тарк этганидан кейин, хусусан, россияликлар Инсон ҳуқуқлари бўйича Европа судига мурожаат қила олмайди. Шу билан бирга, Россия ТИВ матбуот котиби Мария Захарова вазирликнинг баёноти Россиянинг Европа Кенгашидан чиқишини англатадими, деган саволга жавоб бермади.