Алишер Усмоновнинг суперяхтаси Европа Иттифоқи ва АҚШ санкцияларидан кейин экипаж ходимларини, жумладан, яхта капитанини ишдан бўшатди ва кема Гамбургда қолиб кетадиган бўлди. Санкциялар ходимларнинг иш ҳақини тўлаш имкониятларини йўққа чиқарди. Бу ҳақда Bloomberg хабар бермоқда.
Бунгача «Дилбар» яхтасида одатда 80 киши иш олиб борган. Ходимларнинг охирги қисми 7 март, душанба куни 156 метрлик яхтани тарк этди.
Усмоновнинг онаси номи билан аталадиган ва ҳажми бўйича дунёдаги энг катта яхта Германия шимолидаги шаҳарда таъмирдан ўтказилаётган эди. Яхта 25 метрли сузиш ҳавзаси ва иккита вертолёт майдончаси билан машҳур. Маълумотларга кўра, унинг қиймати 600 млн доллардан 750 млн долларгача.
«Биз жамоани ушлаб қолиш учун қўлимиздан келган барчасини қилдик. Аммо иложини тополмадик» — дейди «Дилбар» капитани Тим Армстронг.
68 ёшли Усмонов дунёдаги энг йирик темир рудаси ишлаб чиқарувчилардан бири бўлган Металлоинвест ва МегаФон телекоммуникация компаниясига эгалик қилувчи Россия инвестиция гуруҳи USMнинг асосий улушига эга. Bloomberg Billionaires Index маълумотларига кўра, у 17,8 миллиард доллар бойлиги билан энг бой россиялик миллиардерлардан биридир.
«Дилбар» яхтаси бундан бир неча кун аввал хатловга олинган эди.
Аввалроқ Европа Иттифоқи томонидан Россияга қарши жорий этилган санкциялар рўйхатига USM Holdings асосчиси Алишер Усмонов ҳам киритилгани хабар қилинганди. Шунингдек, асли келиб чиқиши ўзбекистонлик бўлган тадбиркор Алишер Усмонов Халқаро қиличбозлик федерацияси (FIE) президенти лавозимини тарк этган, «Эвертон» Алишер Усмоновга тегишли компаниялар билан ҳамкорлик қилишни тўхтатган.
Изоҳ (0)