УЕФА 2028 йилдан Европа Чемпионати иштирокчилари сонини 32 тага етказмоқчи, дея хабар қилмоқда Daily Mail. Англия профессионал футболчилар ассоциацияси (PFA) бунга қарши.
Европа Чемпионати иштирокчилари сони 2016 йилдан бошлаб 16 тадан 24 тага кўпайтирилганди. Энди эса УЕФА мусобақанинг финал босқичида минтақадаги 55 та терма жамоадан 32 таси иштирок этишини хоҳламоқда.
Англия профессионал футболчилар ассоциацияси (PFA) раиси Маэта Моланго бунга қарши чиқмоқда. Унинг фикрича, бундай қарордан футболчилар ҳам, мухлислар ҳам азият чекади ва мусобақа сифати пасайишига сабаб бўлади.
«Бу шунчаки маҳсулот сифатига путур етказади. Болалар ўз кумирларининг энг яхши ўйинларини кўра олмайди. Ҳақиқат шундай. Ҳа, кенгайтириш қисқа муддатли молиявий фойда олиб келиши мумкин, аммо узоқ муддатга маҳсулотга зарар етказилади.
Футболчилар доим ҳамма нарсани энг сўнгида эшитишидан хавотирланамиз. Жараён шундай тузилганки, ҳамма нарса аллақачон бажариб бўлингандан сўнг улар хабар топади.
Биз Манчестерда ФИФА президенти Жанни Инфантино ва Арсен Венгер билан учрашдик. У ерда Премьер Лига клублари сардорлари ва бошқа футболчилар бор эди. Менимча, энди УЕФА билан гаплашадиган нарсамиз бор. Сўнгги Еврода иштирок этган футболчиларнинг учдан бир қисми Англияда тўп сурарди. Улар муҳокамаларда муҳимроқ рол ўйнашини кутамиз», — дейди Моланго.
Евро—2028 катта эҳтимол билан Буюк Британия ва Ирландияда бўлиб ўтади. Ҳозирча ташкилотга бошқа ариза келиб тушмаган. Расмий равишда мусобақанинг мезбони 2023 йил сентябрь ойида аниқланиши керак, аммо фақатгина битта ариза келиб тушгани ҳисобга олинса, УЕФА қарорни аввалроқ эълон қилиши мумкин.
Изоҳ (0)