Йўловчилар орасида талаб ортиши муносабати билан Тошкентдан Россиянинг Москва ва Санкт-Петербург шаҳарларига қўшимча авиақатновлар амалга оширилади. Бу ҳақда Uzbekistan Airways хабар қилди.
Қайд этилишича, Тошкент—Москва—Тошкент йўналиши бўйича қўшимча рейслар 9 мартдан 14 мартгача ташкил этилади. Тошкент—Санкт-Петербург—Тошкент йўналиши бўйича парвозлар эса 11, 13 ва 14 март кунлари амалга оширилади.
Аввалроқ 13 ва 20 март кунлари Тошкент—Екатеринбург—Тошкент йўналиши бўйича, 9, 16 ва 23 март кунлари Тошкент—Новосибирск—Тошкент йўналиши бўйича ҳам қўшимча авиақатновлар жорий этилиши хабар қилинганди.
Эслатиб ўтамиз, Uzbekistan Airways эса Россия ҳаво ҳудудининг бир қисми ёпилиши билан боғлиқ чеклов сабаб бир қатор шаҳарларга парвозлар жадвали ва йўналишини ўзгартирди. Унга кўра, 3 мартдан 26 мартгача Ўзбекистон—Сочи—Ўзбекистон йўналишида қўшимча қатновлар жорий этилиб, Краснодар ва Ростов-Дон шаҳарларига режалаштирилган парвозлар Сочи шаҳрига амалга оширилади.
Шунингдек, Россиянинг iFly авиакомпанияси 5 март санасидан бошлаб Ўзбекистонга бажарилиши кутилаётган ҳамда барча режалаштирилган йўналишларда ўз парвозларини номаълум муддатга тўхтатганди. Шунингдек, Smartavia авиакомпанияси ҳам 7 март кунига режалаштирилган Москва—Урганч—Москва йўналишидаги парвозни бекор қилди.
Изоҳ (0)