Тошкент шаҳар ҳокими ўринбосари Мухтор Муҳитдинов эгаллаб турган лавозимидан озод этилди. Пойтахт ҳокими Жаҳонгир Ортиқхўжаев 3 март куни бу борадаги тегишли қарорни имзолаган.
Мухтор Муҳитдинов 2020 йилнинг ноябрида Тошкент шаҳар ҳокимининг ўринбосари — шаҳар каналлардан фойдаланиш ва уларга туташ ҳудудларни ободонлаштириш бошқармаси бошлиғи лавозимига тайинланганди. У 1973 йилда Тошкент шаҳрида туғилган. 1996 йилда Тошкент давлат техника университетини, 2004 йилда Ўзбекистон стратегик таҳлил ва истиқболни белгилаш олий мактабини тамомлаган. Мухтор Муҳитдинов пойтахт ҳокими ўринбосари этиб тайинлангунга қадар Тошкент шаҳар Фавқулодда вазиятлар бошқармаси бошлиғи сифатида ишлаб келган.
«Gazeta.uz»нинг Тошкент шаҳар ҳокимлиги матбуот хизматига таяниб ёзишича, у маҳалла ва нуронийларни қўллаб-қувватлаш вазири ўринбосари сифатида фаолиятини давом эттиради.
Эслатиб ўтамиз, март ойи бошида президент фармонига асосан Оила ва хотин-қизлар давлат қўмитаси тузилиши муносабати билан Маҳалла вазирлиги номи ўзгартирилиб, Маҳалла ва нуронийларни қўллаб-қувватлаш вазирлиги сифатида қайта ташкил этилганди. Ўшанда Турсинхон Худойберганов маҳалла вазири лавозимига тайинланди.
Изоҳ (0)