Куни кеча Ўзбекистонда фаолият юритувчи аёл ҳокимларнинг бири ишдан олинди, иккинчиси эса ҳокимликдан қўмита раислигига кўтарилди. Хўш, ҳар икки ҳолат айни кунда амал курсисида ўтирган аёл ҳокимларнинг қандай хулоса қилишига ва келажакдаги иш фаолиятларида нимага эътибор қаратишларига туртки бўлди?
«Дарё» мухбирлари айни кунда фаолият юритаётган аёл ҳокимлар — Андижон вилоятининг Бўстон тумани ҳокими Санобархон Носирова, Самарқанд вилоятининг Каттақўрғон шаҳри ҳокими, сенатор Гавҳар Алимова ҳамда Сирдарё вилояти Боёвут тумани ҳокими сенатор Дилфуза Ўраловаларга юзланиб, бу ҳақда фикрлашди.
Собиқ ҳокимнинг қилган хатолари ва ишдан олиниш сабаблари ОАВда тўлиқ ёритилди
Қарши тумани ҳокими Мақсуда Мустафоева билан ҳали яхши танишиб ҳам улгурмагандим. Лекин қилган хатолари ва ишдан озод қилиниши сабаблари ОАВда тўлиқ ёритилди. Давлат раҳбари қандай хулоса қилган бўлса, демак бунинг ўз сабаблари бор ва мен буни тўғри деб биламан. Барча аёл ҳокимлар бундан хулоса қилиб, кўзини каттароқ очди, назаримда.Президентимиз гендер тенгликни эътиборга олиб, аёлларни ҳам ҳокимликка тайинлади. Эркаклар билан тенгма-тенг ишлашига шароит яратиб берди. Демак, биз аёллар ҳам бу эътиборга шижоат, тўғрилик, поклик, ҳалоллик билан жавоб беришимиз керак. Билишимча, Мақсуда опа хатога йўл қўйган ва юқорида санаб ўтганларимни эътиборсиз қолдирган. Зулайҳо Баҳриддиновнага келадиган бўлсак, улар ўз тажрибасига эга раҳбар. У киши ўз ишига сидқидилдан ёндашгани, берилган вазифаларни ҳалоллик билан бажариб келгани учун ҳам вилоятларга доим хотин-қизлар ишини текшириш учун ишчи гуруҳ таркибида ишончли вакил сифатида юбориларди. Зулайҳо Баҳриддиновна ишончни оқлагани учун ҳам Тўрақўрғон туманига ҳоким етиб тайинланганди. У киши икки йил давомида эркак ҳокимлар қатори халқни рози қилиш учун ўзини аямади. Натижада бугун қўмитага раҳбар бўлди.
Санобархон Носирова, Андижон вилоятининг Бўстон тумани ҳокими
Зулайҳо Баҳриддиновна аёллар билан ишлашда катта тажрибага эга, Мақсуда Сайфуллаевна эса кадр танлашда хатога йўл қўйган бўлиши мумкин
Тўрақўрғон ҳокими Зулайҳо Баҳриддиновнани кўп йилдан бери яхши биламан. Улардаги энг зўр фазилатлар шуки, жуда камтар, ҳалол, меҳнаткаш ва фидойи аёл. Хотин-қизлар дардини яхши тушунадиган, ҳар қандай масалага ечим топиб, ёрдам беришга ҳаракат қиладиган инсон. Янги қўмитага раҳбар этиб тайинланганини эшитиб, жуда қувондим. Аёллар билан ишлашда ҳам катта тажрибага эга.Қарши туманининг собиқ ҳокими Мақсуда Сайфуллаевнанинг айнан нима сабабдан ишдан кетганини аниқ билмайман, хатоларини ҳам сезмаганман. Мақсуда Сайфуллаевнанинг ишини бевосита ўрганмаганман, ич-ичига кирмаганман. Балки кадр танлашда хатога йўл қўйгандир, атрофидагилар қаттиқ ишониб қолгандир. Қўл остида ўз манфаатини ўйлайдиган, фидойи бўлмаган кадрлар бўлгандир. Бу албатта, шахсий фикрим. Лекин уларни бирор жиддий хатога йўл қўйганини эшитмаганман. Ҳар қандай вазиятда ҳам аёлларнинг ҳурматини жойига қўйиш керак деб ўйлайман. Агар хато қилаётган бўлса, атрофидагилар уни тўғрилашга ёрдам бериши лозим. Масалан, ўзим хатога йўл қўймаслик учун вилоят ҳокими билан қўнғироқлашиб, маслаҳат сўрайман, шаҳар фахрийлари билан бамаслаҳат иш олиб бораман.
Гавҳар Алимова, Каттақўрғон шаҳар ҳокими, сенатор
Аёл ҳокимларни кенг жамоатчилик кузатиб, назорат қилиб турибди
Зулайҳо Баҳриддиновна билан муносабатимиз яхши, уларни янги масъулиятли лавозим билан табриклайман ва қўллаб-қувватлайман. Собиқ хотин-қизлар қўмитасида ҳам фаолият юритган, тажриба орттирган ва раҳбар аёл сифатида тан олинган. Фикрини фуқароларга тўғри тушунтирадиган, оғир-босиқ, сўзида тура оладиган аёллардан бири. У кишига ҳурматим баланд. Оила ва хотин-қизлар давлат қўмитасининг муносиб раҳбари бўлиши, давлатимиз раҳбари имзолаган янги қарордаги ҳар бир йўналишни тизимли йўлга солишига ишонаман.Биз аёл ҳокимларни ҳозир кенг жамоатчилик кузатиб, назорат қилиб турибди. Аёл ҳоким сифатида аграр соҳада иш олиб бориш барибир қийинчилик туғдиришига амин бўлдим. Қарши туманининг собиқ ҳокими Мақсуда Сайфуллаевнанинг қишлоқ хўжалиги йўналишида тажрибаси камроқ эди, деб ўйлайман. Лекин у ҳам етук ва узоқни кўра оладиган кадрлардан бири эди. Соғлиғи туфайли ўз аризасига кўра ишдан кетгани ҳақида эшитдим. Соғлиқ инсон учун ҳар доим биринчи ўринда бўлиши керак.
Дилфуза Ўралова, Боёвут тумани ҳокими, сенатор
Умиджон Мамарасулов ҳамда Миролим Исажоновлар суҳбатлашди.
Изоҳ (0)