Toshkent shahar hokimi o‘rinbosari Muxtor Muhitdinov egallab turgan lavozimidan ozod etildi. Poytaxt hokimi Jahongir Ortiqxo‘jayev 3-mart kuni bu boradagi tegishli qarorni imzolagan.
Muxtor Muhitdinov 2020-yilning noyabrida Toshkent shahar hokimining o‘rinbosari — shahar kanallardan foydalanish va ularga tutash hududlarni obodonlashtirish boshqarmasi boshlig‘i lavozimiga tayinlangandi. U 1973-yilda Toshkent shahrida tug‘ilgan. 1996-yilda Toshkent davlat texnika universitetini, 2004-yilda O‘zbekiston strategik tahlil va istiqbolni belgilash oliy maktabini tamomlagan. Muxtor Muhitdinov poytaxt hokimi o‘rinbosari etib tayinlangunga qadar Toshkent shahar Favqulodda vaziyatlar boshqarmasi boshlig‘i sifatida ishlab kelgan.
“Gazeta.uz”ning Toshkent shahar hokimligi matbuot xizmatiga tayanib yozishicha, u mahalla va nuroniylarni qo‘llab-quvvatlash vaziri o‘rinbosari sifatida faoliyatini davom ettiradi.
Eslatib o‘tamiz, mart oyi boshida prezident farmoniga asosan Oila va xotin-qizlar davlat qo‘mitasi tuzilishi munosabati bilan Mahalla vazirligi nomi o‘zgartirilib, Mahalla va nuroniylarni qo‘llab-quvvatlash vazirligi sifatida qayta tashkil etilgandi. O‘shanda Tursinxon Xudoyberganov mahalla vaziri lavozimiga tayinlandi.
Izoh (0)