АҚШ Конгресси Вакиллар палатаси «Россия ва Беларусь билан нормал савдо муносабатлари»ни бекор қилишни назарда тутувчи қонун лойиҳасини ўрганиб чиқмоқда. Бу ҳақда палата спикери Нэнси Пелосига таяниб, Reuters хабар берди.
Маълум қилинишича, ҳужжат билан Россиядан нефть ва бошқа энергия ташувчилар импортини тақиқлаш ҳамда Россияни Жаҳон савдо ташкилотидан (ЖСТ) чиқариб юбориш бўйича «дастлабки қадам» таклиф этилмоқда. Шунингдек, Украинага 10 миллиард доллар ёрдам ажратилиши мумкин.
«Вакиллар палатаси ҳозирда Россияни жаҳон иқтисодиётидан янада яккалатиб қўядиган қаттиқ қонунчиликни жорий этиш имкониятларини ўрганмоқда», — дейди Пелоси.
Россия президентининг матбуот котиби Дмитрий Песков АҚШда Россия нефтини харид қилишга тақиқ қўйиш муҳокама қилинаётгани тўғрисидаги хабарларга изоҳ берар экан, бу дунё энергетика бозорларининг ишида англашилмовчиликларни юзага келтириши мумкинлигини айтган. Кремль «вазиятнинг ривожланишини диққат билан кузатмоқда».
7 март ҳолатига кўра, Brent маркали нефтнинг нархи баррели учун 139 доллардан ошган. Ҳозирда у ИCР бозорида 128 доллар (+8,2 фоиз) даражасида сотилмоқда.
Аввал Евроиттифоқ Россияга қарши янги санкцияларни эълон қилди: айрим банклар SWIFT тизимидан узилади, Марказий банк активлари эса «фалажлантирилиши», Европа Иттифоқи Россиянинг 7 та банкини SWIFT тизимидан узиб қўйилгани, Россиянинг санкцияга учраган банклари Visa ва Mastercard карталарини чиқара олмаслиги ҳақида хабарлар берилган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)