Жанубий Корея Россия Марказий банки билан барча транзакцияларни тўхтатади. Бу ҳақда мамлакат ички ишлар вазирлиги хабар берди. Мазкур қарор Украинага нисбатан амалга оширилаётган ҳарбий операцияларга жавоб тариқасида қабул қилинган.
Жанубий Корея янги санкцияларга оид батафсил маълумотларни ҳукумат билан консультация ўтказиб олганидан сўнг, эълон қилади. Сеул ўз қарори ҳақида Россияга қарши санкциялар қўллаган АҚШ ва бошқа мамлакатларни хабардор қилишини билдирган. Бундан олдин Жанубий Корея Россиянинг еттита банки, жумладан, «Сбербанк», «ВТБ» ва «ВЕБ»га қарши санкциялар жорий этганди.
Шунингдек, Буюк Британия ТИВ раҳбари Прити Пател Интерполдан Россиянинг ташкилот тизимларидан фойдаланишини тўхтатишни сўраган. «Мен бугун АҚШ, Канада, Австралия ва Янги Зеландиядаги ҳамкорларим билан бир қаторда Интерпол ҳамда унинг ижроия қўмитасини шу ҳафтада Россиянинг ўз тизимларига киришини дарҳол тўхтатиш тўғрисида қарор қабул қилишга чақириб, хат йўлладим», — деб ёзади Пател Twitter’даги саҳифасига.
Унинг фикрича, Россиянинг ҳаракатлари инсонлар хавфсизлиги ва ҳуқуқни муҳофаза қилиш органларининг халқаро ҳамкорлигига «тўғридан-тўғри таҳдиддир».
24 февраль кунидан бери Россия Украинада ҳарбий операцияларни ўтказмоқда. Аввалроқ Евроиттифоқ Россияга қарши янги санкцияларни эълон қилди: айрим банклар SWIFT тизимидан узилади, Марказий банк активлари эса «фалажлантирилиши», Европа Иттифоқи Россиянинг 7 та банкини SWIFT’дан узиш масаласини муҳокама қилаётгани, Россиянинг санкцияга учраган банклари Visa ва Mastercard карталарини чиқара олмаслиги ҳақида хабарлар берилган. Шунингдек, АҚШ ҳукумати Россия элитаси, уларнинг оила аъзолари ва компанияларига қарши санкциялар жорий этган. Уларнинг Америкадаги активлари «музлатилади», мол-мулки — блокланади.
Изоҳ (0)