Россия президенти Владимир Путин мансабдор шахсларнинг банк ҳисоб рақамларига келиб тушган маблағлар уч йил давомидаги даромадидан ошиб кетса, уларни ундириб олиш тўғрисидаги қонунни имзолади, деб хабар беради «РИА Новости».
Мазкур қонунга кўра, давлат хизматчилари, шунингдек, уларнинг оила аъзолари, жумладан вояга етмаган фарзандларининг ҳам банк ҳисоб рақамлари прокуратура томонидан текшириб борилади. Агарда мансабдор шахс ва унинг қариндошларини ҳисоб рақамига келиб тушган маблағлар уч йил давомидаги умумий даромадидан 10 минг рублга ортиқ бўлса, судга ушбу маблағларни бюджет ҳисобига мабжурий ундириш бўйича даъво киритилади.
Пулдан айрилмаслик учун амалдор ҳисоб рақамидаги маблағлар қонуний йўл билан пайдо бўлганини исботлаб бериши керак бўлади. Маълумотларни текшириш жараёнида прокуратура ходимлари мансабдор шахс билан гаплашиши, шунингдек, давлат органлари, банклар, кредит ташкилотлари ва кўчмас мулкни рўйхатга олиш бўйича масъул бўлимларга сўров юбориши мумкин.
Эслатиб ўтамиз, Россия 24 февралда Украинада махсус ҳарбий операция бошлаган, икки давлат ўртасидаги урушнинг 11-куни давом этмоқда. 2 март куни Владимир Путин Россия ҳудудидан 10 минг доллардан ортиқ валюта олиб чиқиб кетишни тақиқлаш тўғрисидаги фармонни имзолаганди. Мазкур фармон «АҚШ ҳамда унга қўшилган хорижий давлатлар ҳамда халқаро ташкилотларнинг Россияга қарши санкциялар қўллаш билан боғлиқ дўстона бўлмаган ва халқаро ҳуқуққа зид ҳаракатлари муносабати билан» имзоланган.
Мавзуга доир: Россияда олигархлар даври тугамоқда — Bloomberg
Изоҳ (0)