Республика шошилинч тиббий ёрдам илмий марказининг Қашқадарё филиалида мураккаб трансплантация жарроҳлик амалиёти ўтказилди. 43 ёшли аканинг бир буйраги 41 ёшли бемор сингилга кўчириб ўтказилди. Бу ҳақда «Дарё»га вилоят соғлиқни сақлаш бошқармаси ахборот хизмати раҳбари Нуриддин Эгамов хабар берди.
«Яккабоғлик 41 ёшли бемор аёлда сурункали буйрак етишмовчилиги кузатилди. У ўн тўрт ой давомида ҳафтасига икки маротаба гемодиализ сеансларини олиб, даволаниб келаётганди. Аёлга 43 ёшли акаси донор бўлишга — бир буйрагини беришга қарор қилди. Керакли текширувлардан сўнг шифокорлар операцияни Қаршида ташкил этишди. Республика шошилинч тиббий ёрдам илмий маркази бош директори, тиббиёт фанлари доктори Даврон Тўлаганов, марказ хирургия бўлими раҳбари, профессор Фарҳод Ҳожибоев раҳбарлигидаги 13 кишилик гуруҳ операцияни муваффақиятли якунлади», — дейди филиал директори, тиббиёт фанлари номзоди Дониёр Турсунов.
Маълум қилинишича, операция 7 соатдан кўпроқ вақт давом этган.
«Амалиёт якунидан сўнг бир неча дақиқа ўтгач, кўчириб ўтказилган буйрак ишлади — пешоб ажралиши кузатилди. Айни пайтда ака-сингилнинг аҳволи яхши. Улар ва яқинларининг қувончи чексиз», — дейди вилоят соғлиқни сақлаш бошқармаси бошлиғи, тиббиёт фанлари номзоди Равшан Тўлаков.
Эслатиб ўтамиз, президент Шавкат Мирзиёевнинг 2021 йил 4 октябрдаги «Хирургия хизматини трансформация қилиш, ҳудудларда жарроҳлик амалиётлари сифатини ошириш ва кўламини кенгайтириш чора-тадбирлари тўғрисида»ги қарорига кўра, 2022 йил якунига қадар барча ҳудудларда буйрак трансплантацияси амалиётини йўлга қўйиш кўзда тутилганди.
Изоҳ (0)