4 мартга ўтар кечаси Украинанинг Энергодар шаҳри ўққа тутилиши оқибатида Европадаги энг йирик — Запорожье атом электр станциясининг ўқув биносида ёнғин содир бўлди. Бу ҳақда Украина Фавқулодда вазиятлар вазирлиги хабар берди. Маълумотларга кўра, ёнғин 2 минг метр майдонни эгаллаган бўлиб, олов беш қаватли бинонинг юқори учта қаватини қамраб олган.
Ёнғинни ўчиришда 40 дан ортиқ ўт ўчирувчи иштирок этган ва у маҳаллий вақт билан соат 06:20 да бартараф этилган. Идоранинг қўшимча қилишича, ҳалок бўлганлар ва жароҳат олганлар ҳақида маълумот йўқ.
МАГАТЭнинг маълум қилишича, ёнғин АЭСнинг асосий ускунларига зарар етказмаган. Радиация даражаси нормада экани айтилмоқда.
Ёнғин бошлангандан сўнг Украина президенти Владимир Зеленский тунда фавқулодда видеомурожаат йўллаб, Европани «уйғонишга» чақирди.
Зеленский Россия танклари ядро реактор блокларини ўққа тутаётганини айтди. Унинг сўзларига кўра, фақат Европа зудлик билан чора кўриш орқали рус қўшинларини тўхтата олади.
«Россиядан бошқа ҳеч бир давлат ҳеч қачон ядровий реакторларни ўққа тутмаганди. Тарихимизда, инсоният тарихида биринчи марта террорчи давлат ядровий терроризмга қўл урди», — деди Зеленский.
Зеленский ёнғиннинг эҳтимолий оқибатларини 1986 йилдаги Чернобил фожиаси билан солиштирар экан, Запоржьеда портлаш юз берган тақдирда бутун Европани эвакуация қилишга тўғри келишини айтди.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)