Польша орқали Украинадан эвакуация қилинган Ўзбекистон фуқароларининг сони 2 374 нафарга етди

Uzbekistan Airways’нинг 10 та самолёти ёрдамида Украинадан Польша орқали эвакуация қилинган Ўзбекистон фуқаролари сони 2 374 нафарга етди. Бу ҳақда «Дунё» агентлиги хабар берди.

3 март куни Тошкент вақти билан соат 19:00 ҳолатига кўра, «Карчова» назорат-ўтказиш пунктида ватанга учиб кетиш ниятида бўлган 500 га яқин Ўзбекистон фуқароси тўпланиб турибди.

Маълум қилинишича, «Карчова» назорат-ўтказиш пункти раҳбарияти қочоқлар, жумладан, бошқа давлатлар фуқаролари сони кўпайгани сабабли тўпланиш нуқтасини босқичма-босқич бўшатишни сўралмоқда. Бу сўровларни инобатга олиб, кунига 3 маротабагача ташкил этилаётган махсус рейсларни ўз вақтида тўлдириш учун Ўзбекистон фуқаролари мунтазам равишда автобусларда Катовице аэропортига (360 километр) олиб борилмоқда.

Катовице шаҳри аэропорти тўлган. Элчихона талабига биноан шаҳар мерияси аэропорт биносига тартибли ўтиш ва йўловчиларни рўйхатга олишни ташкил қилган. Тартиб полиция ва маҳаллий кўнгиллилар томонидан назорат қилиняпти. Болали аёллар ва кексалар учун махсус йўлаклар яратилган. Барча фуқароларга олдиндан тайёрланган рўйхатлар асосида хизмат кўрсатилмоқда.

Ўзбекистонлик дипломатлар ва Польша шаҳри ҳокимияти томонидан фуқароларни узлуксиз ва тартибли эвакуация қилиш бўйича кўрилаётган чора-тадбирларга қарамай, субъектив омиллар билан боғлиқ айрим муаммолар мавжуд. Чарчаган ва тушкунликка фуқаролар энг яқин эваукуация рейсларида учиб кетишга уринмоқда, бу эса рўйхатга олиш тартибининг бузилишига олиб келяпти. Борт қўнганда аёллар, қариялар ва болаларга устуворлик берилмоқда.

«Дипломатик ваколатхонамиз ходимлари вазиятни юмшатиш учун барча чораларни кўрмоқда. Ўзбекистоннинг Польшадаги элчихонаси талабига кўра аэропортда фақат ўзбекистонликлар учун иссиқ овқат ташкил этилган. Аэропорт яқинида тез тиббий ёрдам кўрсатиш учун учта автомашина доимий навбатчилик қиляпти. Аэропорт раҳбарияти томонидан болали оналарнинг дам олиши учун махсус қулайликлар ажратилган. Эвакуация даври мобайнида турли сабабларга кўра ўзлари билан зарур ҳужжатлари бўлмаган Ўзбекистон фуқароларига ватанига қайтиш учун 240 дан ортиқ сертификатлар берилган», — дейилади хабарда.

Украинадан эвакуация қилинаётган ўзбекистонликларнинг дастлабки гуруҳи 28 февраль куни, иккинчи гуруҳи эса 1 март куни Тошкентга етиб келди. 2 март куни яна иккита махсус рейс амалга оширилган. Катовице шаҳридан Тошкентга 251 нафар Ўзбекистон фуқароси бўлган олтинчи самолёт 2 март куни соат 20:20 да, еттинчиси 3 март куни 00:30 да келиб қўнганди.