Фарғонада ниқобдаги номаълум шахслар пичоқ билан қуролланиб, алоқа компанияси офисида босқинчилик қилди

Фарғона вилояти Олтиариқ туманида 19 февраль куни уч нафар фуқаро алоқа компанияси офисига ҳужум уюштирди. Бу ҳақда Тергов департаменти хабар қилди.

Қайд этилишича, шу куни соат 00:17 да номаълум шахслар юзига ниқоб тақиб, пичоқ билан қуролланиб, Олтиариқ тумани Ўзбекистон кўчасида жойлашган уяли алоқа компанияси дилерлик шохобчасига ғайриқонуний тарзда кирган. Улар шохобчадаги Т.З.га (21 ёшли) ҳужум қилиб, пичоқ тираб, ҳаёт ва соғлиқ учун хавфли бўлган зўрлик ишлатиш билан қўрқитган. Қўллари билан уриб, тан жароҳати етказиб, шохобчада бўлган 5 миллион сўм пулни талон-торож қилиб, ҳодиса бўлган жойидан яширинган.

Оқибатда Т.З. олган тан жароҳатлари билан Олтиариқ туман тез тиббий ёрдам марказига мурожаат қилган. Маълумотномага кўра, унга бурун суягининг ёпиқ синиши, бурун соҳасида шилинган жароҳат ташхиси қўйилган.

Мазкур ҳолат юзасидан Олтиариқ туман ИИБ ҳузуридаги Тергов бўлинмаси томонидан номаълум шахсларга нисбатан Жиноят кодекснинг 164-моддаси 3-қисми «в» банди (уй-жойга, омборхона ёки бошқа биноларга ғайриқонуний равишда кирган ҳолда босқинчилик) билан жиноят иши қўзғатилган.

Олиб борилган тергов тезкор ҳаракатлари натижасида мазкур жиноятни Олтиариқ туманида яшовчи А.Х. (31 ёшли) ва Э.О. (30 ёшли) ва М.А. (30 ёшли) томонидан содир этилгани аниқланган. Улардан жиноятни содир этишда фойдаланган нарса ва буюмлар ҳамда жиноий йўл билан қўлга киритилган пуллар эвазига сотиб олинган буюмлар ашёвий далил тариқасида расмийлаштириб олинган.

Ҳозирда юқоридаги шахслар жиноят ишида гумон қилинувчи тариқасида жалб қилиниб, процессуал тартибда ушланган. Тергов ҳаракатлари давом этмоқда.