АҚШ сенатори Украинадаги урушни тўхтатиш учун Путинни гумдон қилиш кераклигини айтди. Россия элчиси буни терроризмга даъват деб атади

АҚШдаги Республикачилар партияси сенатори Линдси Гремнинг айтишича, Украинадаги урушни тўхтатишнинг ягона йўли — Россия президенти Владимир Путинни ўлдириш. Бу ҳақда у Twitter’да ёзган.

Россияда Брутлар борми ўзи? Россия армиясида зафарли полковник Штауффенберг борми? Бунга (урушга — таҳр.) чек қўйишнинг ягона йўли — Россияда кимдир анави одамни гумдон қилиши. Бу билан ўз мамлакатингиз ва бутун дунёга катта хизмат қилган бўласиз.

Ҳаммасини тўғрилай оладиган ягона халқ — бу рус халқи. Айтиш осон, қилиш қийин. Агар сиз бутун умр зулматда яшашни, ўта қашшоқлик ва изоляцияда қолишни истамасангиз, олдинга қадам ташлашингиз керак, — деб ёзган АҚШ сенатори.

Мен америкалик сиёсатчининг баёнотини номақбул ва ғазабнок деб биламан. Қўшма Штатлардаги русофобия ва Россияга нисбатан нафрат даражаси чегарадан ошмоқда. Ўзининг ахлоқий қадриятларини бутун инсоният учун «йўлчи юлдуз» сифатида тарғиб қилаётган сенатор Вашингтоннинг халқаро майдондаги мақсадларига эришиш йўлида терроризмга даъват этишига ақл бовар қилмайди. Тепасида шундай масъулиятсиз ва нопрофессионал сиёсатчилар турган АҚШ тақдири учун бу қўрқинчли бўлиб бормоқда. Биз бу америкаликнинг жиноий баёнотлари учун расмий тушунтириш ва қатъий қоралашларни талаб қиламиз, — дейди Россия элчиси.

24 февраль куни Россия президенти Владимир Путин Донбасс аҳолисини ҳимоя қилиш, Украинани «демилитаризация» ва «денасификация қилиш» учун «махсус ҳарбий операция» бошланганини эълон қилди. Кремль гап «ҳарбий салоҳиятни зарарсизлантириш» ва «Украинани нацистлардан тозалаш» ҳақида кетаётганини тушунтирди.

Украина шаҳарларида саккиз кундан буён ўт очишлар давом этмоқда. 27 февраль куни Украина Россия устидан Халқаро судга расман даъво аризасини берди. Унда ўз тажовузини оқлаш мақсадида геноцид тушунчасини бузиб кўрсатгани учун Россиянинг жавобгарликка тортилиши талаб қилинган. 3 март куни Халқаро жиноий суд Украинадаги вазият юзасидан терговни бошлади.