Bellingcat суриштирув гуруҳи аъзоси Христо Грозевнинг айтишича, Украинанинг Харьков шаҳридаги Озодлик майдонига ташланган қанотли ракета шакли ва ўлчами жиҳатидан Россиянинг «Калибр» ракетасига ўхшайди.
Bellingcat ракета келиб тушиши пайтида олинган тасвирларни ўрганиб чиқиб, шундай хулосага келган. «Украинада бундай ракеталар йўқлиги ҳаммага маълум», — деди Грозев.
Харьковдаги вилоят маъмурияти биноси жойлашган Озодлик майдонига ракета ҳужуми 1 март куни эрталаб содир этилганди. Портлаш оқибатида етти киши ҳалок бўлди, 20 дан ортиқ одам жароҳатланди. Украина президенти Владимир Зеленский ракета зарбасини «очиқдан очиқ террор» деб атади.
Россиянинг қатор оммавий ахборот воситаларида рус ҳарбийларнинг «Харьковдаги портлашга алоқаси йўқлиги» ҳақида мақолалар чоп этилган.
24 февраль куни Россия президенти Владимир Путин Донбасс аҳолисини ҳимоя қилиш, Украинани «демилитаризация» ва «денасификация қилиш» учун «махсус ҳарбий операция» бошланганини эълон қилди. Кремль гап «ҳарбий салоҳиятни зарарсизлантириш» ва «Украинани нацистлардан тозалаш» ҳақида кетаётганини тушунтирди. Путиннинг баёнотидан кейин Украина шаҳарлари бир неча бор ўққа тутилди. Россия Мудофаа вазирлиги бунга алоқадорлигини рад этмоқда.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)