Россия Мудофаа вазирлиги Украинада ҳарбий операциялар бошланганидан бери илк марта урушдаги йўқотишлар ҳақида маълумот берди. Унга кўра операциялар давомида 498 нафар россиялик ҳарбий ҳалок бўлган, 1597 нафар аскар яраланган. Бу ҳақда вазирлик расмийси Игорь Конашенков маълум қилган. У ҳалок бўлганларнинг оилаларига ижтимоий ёрдам кўрсатилаётганини билдирган, деб ёзмоқда «Коммерсантъ».
«Яна бир марта Россия Мудофаа вазирлиги тезкор муддатли хизмати ҳарбийлари ҳам, ҳарбий ўқув муассасалари курсантлари ҳам операцияларда иштирок этмаётганини эслатиб ўтаман. Ғарбнинг кўплаб оммавий ахборот воситалари, шунингдек, айрим рус ОАВда тарқалган Россия қўшинидаги катта йўқотишлар ҳақидаги ахборотлар атайин тарқатилаётган нотўғри маълумотлар»,— деган Игорь Каншенков.
«Миллатчилар ҳамда Украина тузилмаларининг ҳарбийлари орасидаги йўқотишларга келсак, уларда 2870 нафар аскар ўлдирилган ва 3700 га яқин ҳарбий яраланган. Тасдиқланган маълумотларга кўра, Украина кучишлатар тизимларида фаолият олиб борган ҳарбийлардан 572 нафари асирга олинган»,— дея Украина томонида кузатилаётган йўқотишлар хусусида гапирган Россия Мудофаа вазирлигининг вакили.
Россия Мудофаа вазирлиги Владимир Путин буйруғи асосида 24 февралда Украина ҳудудида махсус ҳарбий операцияларни бошлаган. Игорь Конашенковнинг айтишича, Россия ҳарбийлари Украина ҳудудида юзага келган хавфсизликка росмана таҳдидни бартараф этмоқда. Конашенков акс ҳолда Украинада яқин вақт ичида НАТО ҳарбий базалари, ядро қуроли ва уни етказиб бериш воситалари пайдо бўлиши тахмин қилинганини қайд этган.
Аввалроқ Россия кучлари Украинанинг Херсон шаҳрини назоратга олгани хабар қилинганди.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)