Россия ва Украина ўртасида кечаётган оғир сиёсий вазият медиа ва кино соҳасига ҳам сезиларли таъсир қилди. Жумладан, Netflix рус ижодкорлари томонидан тақдим этилган барча лойиҳалар устида ишларни тўхтатди. Бундан ташқари, The Walt Disney Company, Warner Bros, Sony Pictures ва Universal Pictures каби йирик кинокомпаниялар Россияда ўтказилиши кутилаётган премьераларни бекор қилди. «Дарё» шулар ҳақида сўз юритади.
Хабарларга кўра, Netflix стриминг платформаси бош ролда Светлана Ходченкова иштирок этган «Анна К» сериали, Александр Петров иштирокидаги яна бир сериал, Юра Борисов қатнашган «Арзирли ҳеч нима» («Ничего особенного») ва Даря Жукнинг «Бироқ» («Зато») криминал триллери ва бошқа лойиҳалар намойишини бекор қилган.
Аввалроқ платформа Россиянинг «Биринчи канал», «НТВ», «Спас» ва бошқа марказий телеканаллари трансляциясидан ҳам бош тортганди. 2021 йил декабрь ойида 100 мингдан ортиқ россиялик фойдаланувчи Netflix’га обуна бўлгач, Роскомнадзор ушбу платформани аудиовизуал реестрга қўшган ва Россия қонунчилигига мувофиқ унга Россия телеканалларини кўрсатиш мажбуриятини юклаган. Лекин, расмий баёнотга кўра, Netflix бу талабни бажариш ниятида эмас.
Биринчи бўлиб Disney студияси Россияга прокатни бекор қилди. 10 март куни Pixar’нинг «Қизариб кетяпман» (I’m blushing) мультфильми премьераси ўтказилиши кутилаётганди.
5 майда Marvel’нинг «Доктор Стренж телбалик мултидунёсида» (Doctor Strange in the multiverse of madness) блокбастери, 16 июнда эса Базз Лайтер ҳақидаги «Ўйинчоқлар ҳикояси» номли spin-off Россия катта экранларига узатилиши керак эди. Лекин бу премьералар тақдири ҳозирча номаълумлигича қолмоқда.
Disney’дан сўнг Warner студияси ўз ишларини Россия ҳудудида намойиш қилишдан бош тортди. 3 март куни йилнинг энг кутилган фильмларидан бири — Мэтт Ривзнинг Роберт Паттинсон иштирокидаги «Бэтмен» фильми прокатга чиқиши режалаштирилганди. Бошқа премьераларни бекор қилиш ҳақида ҳозирча гап йўқ. Бироқ апрель ойида машҳур «Афсонавий махлуқлар» (Fantastic beasts) фараншизасининг учинчи қисми чиқиши кутилаётганди. Олдинги икки қисм Россияда 20 миллион доллардан ортиқроқ маблағ йиғган.
Warner ўз баёнотида шундай дейди:
Биз вазиятни кузатишда давом этамиз ва фожиа тез орада тинч йўл билан ҳал қилинишини кутамиз.Sony ҳам март охирига мўлжалланган, Жаред Лет0 иштирокидаги «Морбиус» картинасини Россия прокатларига чиқармаслик ҳақида маълум қилди. Компания баёнотида бошқа кечиктиришлар ҳақида (ҳозирча) гапирилмаган.
Universal ва Paramount ҳам, ўз навбатида, режалаштирган премьераларни кейинга сурган. Universal томонидан 24 март кунга режалаштирилган «Ёмон йигитлар» (The bad guys) мультфильми ва Майкл Бейнинг 7 апрелга мўлжалланган «Тез ёрдам» (Ambulance) фильми энди Россияда томошабинлар эътиборига ҳавола этилмайди.
Hollywoodreporter хабарига кўра, Америка ва унинг иттифоқчилари Россияни ўз контентидан маҳрум қилиш ниятида. Бу фақат сиёсат билан боғлиқ эмас. Студиялар Россиянинг глобал SWIFT банк тизимидан узилиши муносабати билан шундай қилиши мумкин (ва бу ҳаракат аллақачон бошланди). SWIFT бўлмаса, студиялар Россия дистрибюторларидан пул олиши жуда қийинлашиб кетади. Хорижга валюта олиб чиқишга ҳам вақтинчалик чеклов қўйилган. Бундан келиб чиқадики, барча Ғарб фильмлари яқин келажакда Россия кинотеатрларидан ғойиб бўлиши мумкин.
Бу йўқотиш бутун рэпертуарнинг, тахминан, 80 фоизини ташкил қилади. Премьералар бекор қилиниши фонида россияликлар янги рус фильмларини белгиланган санадан олдинроқ чиқаришни ва эскиларини такроран намойиш қилишни режалаштирмоқда.
«Централ партнёршип» дистрибютори 3 мартдан 5 мартгача Милош Бикович ва Кристина Асмус иштирокидаги «Турмуш қурмоқчиман» комедияси («Хочу замуж») премьерасини ўтказмоқчи. Россия кинопрокатини қўллаб-қувватлаш мақсадида «Қарол» («Холоп», 2019), «Юқорига ҳаракат» («Движение вверх», 2017) ва «Дада» («Батя», 2021) картиналари экранга қайтарилган.
Изоҳ (0)