2021 йилнинг ноябрида Тошкентдаги корхона ётоқхонасида содир бўлган портлаш оқибатида 18 киши жароҳат олгани тўғрисида хабар берилганди. Бош прокуратура матбуот котибининг «Дарё»га маълум қилишича, портлаш юзасидан қўзғатилган жиноят иши доирасида уч киши қамоққа олинган.
29 ноябрь куни соат 05:05 да Сергели тумани Нилуфар 3-тор кўчасида жойлашган «Узмилл» МЧЖ ҳудудида ишчилар учун жойлашган ётоқхонада ёнғин содир бўлган ва бир неча ишчилар турли жароҳатлар билан шифохонага ётқизилган эди.
Ушбу ҳолат юзасидан «Сергелитумангаз» таъминоти бўлими мансабдор шахсларига нисбатан Тошкент шаҳар прокуратураси томонидан Жиноят кодексининг 205-моддаси (ҳокимият ёки мансаб ваколатини суиистеъмол қилиш) 2-қисми «а» банди ва бошқа моддалар билан жиноят иши қўзғатилган.
Тергов давомида аниқланишича, «Узмилл» МЧЖ раҳбари расмий хатлар орқали жамият ҳудудидаги ерости қувуридан ҳавога газ сизиб чиқаётгани тўғрисида «Сергелитумангаз» таъминоти мансабдор шахсларини хабардор қилган. Бироқ «Сергелитумангаз» таъминоти бўлими мансабдор шахслари газ сизиб чиқишини бартараф этиш юзасидан чораларни кўрмаган.
Оқибатда ерости газ қувури тешикларидан ҳавога газ учиб чиқиб чақнаш сабабли портлаш содир бўлган ва ёнғин оқибатда 18 нафар ишчилар турли оғир тан жароҳатлари олиб, кўрсатилган тиббий ёрдамга қарамасдан, улардан 2 нафари вафот этган.
Ҳозирда жиноят иши доирасида 3 нафар шахс — «Сергелитумангаз» таъминоти бўлими бошлиғи, бош муҳандис ва фойдаланиш бўйича назорат хизмати бошлиғига нисбатан «қамоққа олиш» тарзидаги эҳтиёт чоралари қўлланилган. Ҳозирда тергов ҳаракатлари якунлаш арафасида.
Бундан олдин Андижонда тўрт нафар фуқаро ис газидан заҳарланиб вафот этгани, Қўқондаги хонадонда газ портлаши содир бўлгани, Фарғонадаги ҳаммомда газ портлаши оқибатида 3 киши вафот этгани тўғрисида хабар берилганди.
Изоҳ (0)