Ўзбекистон элчихонасига тегишли бўлган микроавтобус Ўзбекистон фуқароларини Харьковдан эвакуация қилаётган пайтда шрапнел (думалоқ ўқлар билан тўлдирилган артиллерия снаряди) парчаси келиб урилган. Бу ҳақда Ўзбекистоннинг Украинадаги элчиси Алишер Курманов «Дарё» нашрига берган интервьюсида маълум қилди.
«Харьковда элчихонага тегишли дипломатик микроавтобуснинг олди ойнасига, ён томонни кўрсатувчи ойналарига снаряд парчаси зарар етказган. Шрапнел тушган дейишди», — деди элчи.
Алишер Курмановнинг айтишича, ҳодиса оқибатида фуқаролар жабрланмаган.
Дипломатимиз талабалар билан биргаликда поездга чиқиб, Львовга етиб олиши керак эди. Харьковдан машинада чиқиб кетиш жудаям қийин ва хатарли эди. Машинада етиб боролмасдик. Биз имкон қадар манзилга тез боришимиз керак эди. Машинага зарар етган, унинг устига ёнилғи ҳам тугаганди. Шу сабабли микроавтобусни вокзалда қолдирдик», — деди Алишер Курманов.
Ташқи ишлар вазирлигининг қўшимча қилишича, снаряд тушган вақтда микроавтобус автотураргоҳда бўлган.
Элчининг сўзларига кўра, вазият тинчиганидан сўнг ўзбек диаспораси вакилларидан машинани бошқа жойга олиб қўйиш илтимос қилинади.
Алишер Курманов билан уюштирилган тўлиқ интервьюни ушбу ҳаволада ўқишингиз мумкин.
Изоҳ (0)