Расман: ФИФА Россияда халқаро ўйинлар ўтказишни тақиқлади. Украинадаги вазият юмшамаса Россия терма жамоаси мусобақалардан четлатилиши мумкин
ФИФА Украинадаги ҳарбий ҳаракатлар сабаб Россия терма жамоасига нисбатан қатор чекловларни жорий қилди.
Унга кўра, Россия мамлакатида халқаро мусобақа ва ўйинлар ўтказилмайди, терма жамоа эса уй ўйинларини нейтрал майдонда мухлисларсиз ўтказади.
Россия шарафини ҳимоя қиладиган жамоа барча мусобақаларда Россия эмас, «Россия футбол иттифоқи (РФИ)» номи билан қатнашади. РФИ иштирокидаги ўйинларда Россия байроғи ва мадҳияси ишлатилмайди.
ФИФА Украинадаги вазият тез орада ечим топмаса, Россияга қўшимча санкциялар қўллаш ва уни мусобақалардан четлатиш масаласини кўриб чиқишга тайёр экани, бу борада ХОҚ, УЕФА ва бошқа спорт ташкилотлари билан алоқада бўлиб туриши айтилган.
Шунингдек, ФИФА ўз баёнотида ЖЧ—2022 ўтиш ўйинларида Россия терма жамоасига қарши ўйнашдан бош тортишини маълум қилган Польша, Швеция ва Чехия футбол ассоциацияларининг позициясини инобатга олгани ҳамда ечим топиш мақсадида улар билан мулоқотга киришгани ҳақида маълум қилган.
24 февраль куни Россия президенти Владимир Путин Донбассда «махсус ҳарбий операция» бошланганини эълон қилди. Айни вақтда Украинанинг қатор ҳудудларида ҳарбий ҳаракатлар давом этмоқда.
25 февралда УЕФА 2022 йилнинг май ойида бўлиб ўтиши режалаштирилган Чемпионлар Лигаси финалини Санкт-Петербургдан олиб қўйган ва Парижга кўчирганди.
