Hyatt Regency Tashkent меҳмонхонасидаги давлат улуши сотила бошлади. Бу ҳақда Давлат активларини бошқариш агентлиги (ДАБА) сайтида эълон қилинди.
Қайд этилишича, савдолар «Пойтахт қурилиш ва хизмат» ДУКнинг 100 фоиз давлат улушини сотувга чиқариш орқали амалга оширилади.
Ушбу савдо жараёнига «KPMG Valuation and Consulting» МЧЖ молиявий маслаҳатчи сифатида жалб қилинган. Савдолар очиқ аризалар бериш йўли билан ташкил этилади.
Меҳмонхонанинг 2018 йилда соф фойдаси 11,9 млрд сўмни, 2019 йилда 53,5 млрд сўмни ташкил этган. 2020 йилда коронавирус туфайли фойда кўрилмаган. 2021 йил учун маълумотлар йўқ.
Беш юлдузли Hyatt Regency Tashkent меҳмонхонаси 2016 йилда Тошкентда очилган ва Hyatt халқаро брендининг Ўзбекистондаги биринчи меҳмонхонасига айланган эди. Меҳмонхона Жамғариб бориладиган пенсия тизими маблағлари ҳисобидан «Халқ банки»нинг кредити орқали қурилган.
Меҳмонхонанинг умумий ер майдони 3,1 гектар, бино ва иншоотлар майдони 60,1 минг квадрат метрни ташкил этади.
Hyatt Regency Tashkent сентябрдан сотувга қўйилиши режалаштирилган эди.
Изоҳ (0)