Қашқадарёда нефть ва газ қидирувчи ташкилот қарийб 200 млрд сўмга аукционга қўйилди. Корхона ўтган йили 1 млрд сўм фойда олиб келган

Қашқадарё вилояти Косон туманидаги «Косон нефть газ қидирув экспедицияси» МЧЖнинг 100 фоиз давлат улуши кимошди савдосига қўйилди. Лот маълумотлари «E-auksion» порталида эълон қилинган.

Лот изоҳида ёзилишича, ташкилот Давлат активларини бошқариш агентлиги (ДАБА) Қашқадарё вилоят ҳудудий бошқармасининг 2020 йилдаги буйруғи билан аукционга қўйилган. 

30 гектар майдонда жойлашган корхонада йилига ўртача 1200 нафар ишчи фаолият олиб боради. Бино ва иншоотларнинг умумий майдони 45 962 квадрат метрни ташкил қилади.

Аукционга қўйилган корхонанинг бошланғич баҳоси — 195,25 млрд сўм. Аризалар 4 март 09:00 га қадар қабул қилинади. Савдолар худди шу куни 10:00 да бошланади.

Ташкилотнинг кредиторлик қарздорлиги 343,8 млрд сўм бўлса, дебиторлик қарздорлиги 19,7 млрд сўмдан иборат.

«Косон нефть газ қидирув экспедицияси» МЧЖ 2021 йилда 1 млрд сўм фойда кўрган эди. 2020 йилда ташкилотнинг фойдаси 4,25 млрд сўмни ташкил қилган.