Формула-1 Россиянинг Украинадаги ҳарбий ҳаракатлари туфайли 2022 йили Россияда ўтказилиши белгиланган Гран-прини бекор қилди.
24 февраль куни FIА ва Формула-1 раҳбарияти ушбу масалани муҳокама қилган.
«Биз Украинадаги воқеалар ривожини қайғу ва ҳайрат билан кузатяпмиз. Тез орада бу ҳолат тинчлик йўли билан бартараф этилишига умид қиламиз.
Раҳбарият ва аксионерлар билан келишган ҳолда жорий вазиятда Россияда Гран-при ўтказиш иложсиз деган қарорга келдик», — дейилади Формула-1 баёнотида.
24 февраль куни Россия президенти Донбассда «махсус ҳарбий ҳаракатлар» бошланганини маълум қилди. Ўша куни Украинанинг қатор ҳудудларида ҳарбий ҳаракатлар амалга оширилган.
24 февраль куни футбол бўйича Украина Премьер Лигасининг жорий мавсуми тўхтатилди. 25 февралда УЕФА 2022 йилнинг май ойида бўлиб ўтиши режалаштирилган Чемпионлар Лигаси финалини Санкт-Петербургдан олиб қўйган ва Парижга кўчирганди.
Изоҳ (0)