Европа Иттифоқининг ДХР ва ЛХР мустақиллигини тан олгани учун Россияга қарши жорий этган санкциялари кучга кирди. Санкциялар қўлланган россияликларнинг тўлиқ рўйхати 23 февраль куни иттифоқ журналида эълон қилинган.
Чеклов чораларига кўра, Россиянинг 22 нафар фуқаросига Европа Иттифоқи мамлакатлари ҳудудига кириш тақиқланади ва уларнинг активлари музлатилади. Улар орасида Россия мудофаа вазири Сергей Шойгу, ТИВ расмий вакили Мария Захарова, президент администрацияси раҳбари Антон Вайно, Россия Коммунистик партияси раҳбари Геннадий Зюганов, шунингдек, Россия Давлат думаси вице-спикери Пётр Толстой, РТ телеканали раҳбари Маргарита Симонян ва телебошловчи Владимир Соловёв бор.
Бундан ташқари, Европа Иттифоқи ҳужжатида юридик шахслар ҳам келтириб ўтилган. Улар орасида «Россия», «ПСБ» банклари, «VEB.RF» Россия давлат тараққиёт корпорацияси, шунингдек, матбуотда «троллар фабрикаси» сифатида танилган Интернет тадқиқотлари агентлиги мавжуд.
Европа Иттифоқидан ташқари Россияга қарши санкцияларни Буюк Британия, Австралия, Канада ва Япония ҳам жорий этди. Байден ДХР ва ЛХР мустақиллигини тан олган Россияга қарши санкциялар эълон қилди.
Россия президенти Владимир Путин 21 февраль куни Хавфсизлик кенгаши йиғилишида ДХР ва ЛХР мустақиллигини эълон қилиш таклиф этилганидан кейин, мамлакат фуқароларига мурожаат йўллади ва республикаларнинг мустақиллигини тан олиш ҳақидаги фармонни имзолади. 22 февраль куни Россия давлат думаси ва федерация кенгаши ушбу фармонни ратификация қилди.
Изоҳ (0)