Флойд Мейвезер номи бугунги кунда дунёнинг энг бой спортчиларидан бири ва бокс тарихидаги энг яхши жангчи сифатида эътироф этилади. У дунё бўйлаб ўнлаб кошоналарга, миллионлаб долларларга безатилган юзлаб ҳашаматли спорт автомобилларга, шахсий самолётларга ва «қоп-қоп» пулларга эгалик қилади. У ўз шахсий бизнес империясига асос солган ва уни муваффақиятли бошқариб келмоқда. Мейвезернинг рингдаги фаолияти эса ортиқча изоҳ ва шарҳга эҳтиёж сезмайди.
У профессионал боксдан кетганидан кейин ҳам бир неча кўргазмали жангларда қатнашиб, «астрономик пуллар»ни ишлаб олган. Бунга мисол сифатида Конор Макгрегор ва блогер Логан Полга қарши ўтказилган жангларни мисол келтириш мумкин. Аммо 24 февраль куни 45 ёшга тўлган Флойднинг саргузаштлари ҳам доим бундай силлиқ бўлмаган. У ўта оғир қашшоқликда катта бўлган ва ўз тоғаси томонидан отиб ташланишига бир бахя қолган.
Флойднинг отаси оғуфуруш, онаси эса гиёҳванд бўлган
Флойд 1977 йилда боксчилар оиласида туғилган: отаси катта-Флойд (унинг исми ҳам Флойд бўлган), амакилари Жефф ва Рожер ҳам бокс билан шуғулланган. Рожер ҳатто икки вазн тоифасида жаҳон чемпиони бўлишга ҳам муваффақ бўлган. Мейвезернинг отаси, гарчи яхши боксчи бўлса-да, юлдуз мақомига эриша олмаган.
Бироқ катта-Флойд гиёҳванд моддаларни тарқатишда яхшигина «муваффақият қозонган». Флойднинг онаси ҳам гиёҳванд моддаларга қарам бўлган. У Мейвезернинг отаси билан айнан шу нарса сабаб танишгани ҳам айни ҳақиқат. Бундан олдин ҳам унинг бошқа эркаклардан икки қизи бор эди. Мейвезерларнинг яшаш жойи эса том маънода гиёҳвандлар уйини эслатиб юборарди.
Флойд ҳали икки ёшга тўлмаганида, онаси Дебора Цинклернинг амакиваччаси Толи Цинклер боксчининг отасига ов милтиғи билан ҳужум қилади. Бунга Мейвезернинг ундан қарздорлиги сабаб бўлганди. Ота ўғлини ҳимоя қилиш ўрнига ундан қалқон сифатида фойдаланади. Яхшики, бу иш бермайди: ўқ катта-Мейвезернинг оёғига тегади. Бола мўъжиза туфайлигина омон қолади.
Мейвезернинг болалиги ишчилар яшовчи Гранд-Рапидс шаҳрида ўтади, у ерда омон қолишнинг эса атиги бир неча йўли бор эди: мебель саноатида ишлаш, автомобиль қисмларини ишлаб чиқариш ёки гиёҳванд моддаларни тарқатиш. Аммо бироз вақт ўтгач, оила Нью-Жерсига кўчиб ўтади.
Боксчининг ўзи ўша вақтни даҳшат билан эслайди: «Ўшанда кўрганларимни ҳеч қачон унутмайман. Йўлаклар ёритилмасди, нотўғри томонга бурилиб кетасиз ва агар ўлдиришмаса, ҳеч қандай саволсиз талон-тарож қилинасиз. Бир хонали уйда яшардик, у ер иситилмасди, иссиқ сув ҳам йўқ эди. Етти киши эдик. Умуман ҳеч қандай буюм бўлмаган. Омон қолишга имкон қадар ҳаракат қилардик».
Флойддаги боксга бўлган истеъдодни бувиси пайқаган
Флойд узоқ вақт давомида онасининг фамилиясида бўлган — Цинклер. Чунки у никоҳсиз бола эди. Етти ёшида эса отаси илк марта Мейвезерни бокс залига олиб боради, аммо жангчининг тақдирини белгилаган асосий шахс унинг бувисидир.
«Кунлардан бир куни боксни ташлаб, иш топиш ҳақида ўйлаганман, аммо бувим бокс билан шуғулланаётганимни кўриб шундай деди: ‘Йўқ, бокс билан шуғулланишинг керак. Албатта, муваффақиятга эришасан ва пулинг ҳам кўп бўлади’. Бу сўзлар, эҳтимол, ҳаётимни белгилаб бергандир», — дея эслайди Флойд.
Мейвезер маҳаллий мусобақаларда қатнаша бошлаганида, барибир отасининг фамилиясини олади — бу шунчаки бокс оламида маълум бўлган номдан фойдаланиш эди. Шу тариқа катта-Мейвезер унинг илк мураббийига айланади. Бироқ ота-бола узоқ муддат бирга ишлай олмайди. У гиёҳванд моддалар тарқатгани учун 5 йилга озодликдан маҳрум этилади.
Катта-Мейвезер ноқонуний фаолиятини оиласини боқиш ва бўлажак ринг юлдузига ёрдам бериш учун қилгани билан изоҳлайди.
Шундан кейин уни Рожер исмли амакиси шуғуллантира бошлайди ва айнан у боксчини энг йирик ғалабалар сари етаклайди. Флойднинг ўзи ҳам буни тасдиқлайди: «Отам усиз ҳеч нарсага эриша олмаслигимни айтишни яхши кўради, аммо у қилган ягона нарса — мени спорт залига олиб боргани эди».
Рожер жиянига нақ 15 йил давомида мураббийлик қилди, аммо 2016 йилга келиб, унинг соғлиғи жуда ёмонлашди. У қандли диабет ва бир қатор бошқа касалликлардан азият чекади, умрининг охирларида эса хотираси кескин пасайиб кетганди. Рожер 2020 йилда оламдан кўз юмади.
Ота ва ўғил ўртасидаги муносабатлар ҳар доим мураккаб бўлган. Аммо ҳозир Мейвезерлар бир-бири билан яхши чиқишади. Мэнни Пакьяога қарши жангдан бери (2015 йил) Мейвезер ўғлининг бурчагидан жой олиб келади.
Айтишларича, Флойд боксдаги илк йирик ғалабаларни қўлга кирита бошлаганида мактабни бутунлай ташлаб қўяди, ҳатто унинг карра жадвалини ҳам тўлиқ билмаслиги айтилади. Ҳозир Мейвезернинг бу жадвални билиши ёки аксинча эканлиги номаълум, аммо у тарихдаги энг бой икки спортчининг бири ҳисобланади.
Мейвезернинг сўзларига кўра, унинг бойлиги 2021 йилда 1,2 млрд долларга етган. Боксчининг ҳеч кимга ўхшамаслиги ва агар керак бўлса, 50 ёшда ҳам янги чақириқларга (барча соҳаларда) тайёрлиги ҳисобга олинса, бу миқдорнинг яна ошиши ва унинг янгидан янги қирралари очилишига шубҳа йўқ.
Изоҳ (0)