Floyd Meyvezer nomi bugungi kunda dunyoning eng boy sportchilaridan biri va boks tarixidagi eng yaxshi jangchi sifatida e’tirof etiladi. U dunyo bo‘ylab o‘nlab koshonalarga, millionlab dollarlarga bezatilgan yuzlab hashamatli sport avtomobillarga, shaxsiy samolyotlarga va “qop-qop” pullarga egalik qiladi. U o‘z shaxsiy biznes imperiyasiga asos solgan va uni muvaffaqiyatli boshqarib kelmoqda. Meyvezerning ringdagi faoliyati esa ortiqcha izoh va sharhga ehtiyoj sezmaydi.
U professional boksdan ketganidan keyin ham bir necha ko‘rgazmali janglarda qatnashib, “astronomik pullar”ni ishlab olgan. Bunga misol sifatida Konor Makgregor va bloger Logan Polga qarshi o‘tkazilgan janglarni misol keltirish mumkin. Ammo 24-fevral kuni 45 yoshga to‘lgan Floydning sarguzashtlari ham doim bunday silliq bo‘lmagan. U o‘ta og‘ir qashshoqlikda katta bo‘lgan va o‘z tog‘asi tomonidan otib tashlanishiga bir baxya qolgan.
Floydning otasi og‘ufurush, onasi esa giyohvand bo‘lgan
Floyd 1977-yilda bokschilar oilasida tug‘ilgan: otasi katta-Floyd (uning ismi ham Floyd bo‘lgan), amakilari Jeff va Rojer ham boks bilan shug‘ullangan. Rojer hatto ikki vazn toifasida jahon chempioni bo‘lishga ham muvaffaq bo‘lgan. Meyvezerning otasi, garchi yaxshi bokschi bo‘lsa-da, yulduz maqomiga erisha olmagan.
Biroq katta-Floyd giyohvand moddalarni tarqatishda yaxshigina “muvaffaqiyat qozongan”. Floydning onasi ham giyohvand moddalarga qaram bo‘lgan. U Meyvezerning otasi bilan aynan shu narsa sabab tanishgani ham ayni haqiqat. Bundan oldin ham uning boshqa erkaklardan ikki qizi bor edi. Meyvezerlarning yashash joyi esa tom ma’noda giyohvandlar uyini eslatib yuborardi.
Floyd hali ikki yoshga to‘lmaganida, onasi Debora Sinklerning amakivachchasi Toli Sinkler bokschining otasiga ov miltig‘i bilan hujum qiladi. Bunga Meyvezerning undan qarzdorligi sabab bo‘lgandi. Ota o‘g‘lini himoya qilish o‘rniga undan qalqon sifatida foydalanadi. Yaxshiki, bu ish bermaydi: o‘q katta-Meyvezerning oyog‘iga tegadi. Bola mo‘jiza tufayligina omon qoladi.
Meyvezerning bolaligi ishchilar yashovchi Grand-Rapids shahrida o‘tadi, u yerda omon qolishning esa atigi bir necha yo‘li bor edi: mebel sanoatida ishlash, avtomobil qismlarini ishlab chiqarish yoki giyohvand moddalarni tarqatish. Ammo biroz vaqt o‘tgach, oila Nyu-Jersiga ko‘chib o‘tadi.
Bokschining o‘zi o‘sha vaqtni dahshat bilan eslaydi: “O‘shanda ko‘rganlarimni hech qachon unutmayman. Yo‘laklar yoritilmasdi, noto‘g‘ri tomonga burilib ketasiz va agar o‘ldirishmasa, hech qanday savolsiz talon-taroj qilinasiz. Bir xonali uyda yashardik, u yer isitilmasdi, issiq suv ham yo‘q edi. Yetti kishi edik. Umuman hech qanday buyum bo‘lmagan. Omon qolishga imkon qadar harakat qilardik”.
Floyddagi boksga bo‘lgan iste’dodni buvisi payqagan
Floyd uzoq vaqt davomida onasining familiyasida bo‘lgan — Sinkler. Chunki u nikohsiz bola edi. Yetti yoshida esa otasi ilk marta Meyvezerni boks zaliga olib boradi, ammo jangchining taqdirini belgilagan asosiy shaxs uning buvisidir.
“Kunlardan bir kuni boksni tashlab, ish topish haqida o‘ylaganman, ammo buvim boks bilan shug‘ullanayotganimni ko‘rib shunday dedi: ‘Yo‘q, boks bilan shug‘ullanishing kerak. Albatta, muvaffaqiyatga erishasan va puling ham ko‘p bo‘ladi’. Bu so‘zlar, ehtimol, hayotimni belgilab bergandir”, — deya eslaydi Floyd.
Meyvezer mahalliy musobaqalarda qatnasha boshlaganida, baribir otasining familiyasini oladi — bu shunchaki boks olamida ma’lum bo‘lgan nomdan foydalanish edi. Shu tariqa katta-Meyvezer uning ilk murabbiyiga aylanadi. Biroq ota-bola uzoq muddat birga ishlay olmaydi. U giyohvand moddalar tarqatgani uchun 5 yilga ozodlikdan mahrum etiladi.
Katta-Meyvezer noqonuniy faoliyatini oilasini boqish va bo‘lajak ring yulduziga yordam berish uchun qilgani bilan izohlaydi.
Shundan keyin uni Rojer ismli amakisi shug‘ullantira boshlaydi va aynan u bokschini eng yirik g‘alabalar sari yetaklaydi. Floydning o‘zi ham buni tasdiqlaydi: “Otam usiz hech narsaga erisha olmasligimni aytishni yaxshi ko‘radi, ammo u qilgan yagona narsa — meni sport zaliga olib borgani edi”.
Rojer jiyaniga naq 15 yil davomida murabbiylik qildi, ammo 2016-yilga kelib, uning sog‘lig‘i juda yomonlashdi. U qandli diabet va bir qator boshqa kasalliklardan aziyat chekadi, umrining oxirlarida esa xotirasi keskin pasayib ketgandi. Rojer 2020-yilda olamdan ko‘z yumadi.
Ota va o‘g‘il o‘rtasidagi munosabatlar har doim murakkab bo‘lgan. Ammo hozir Meyvezerlar bir-biri bilan yaxshi chiqishadi. Menni Pakyaoga qarshi jangdan beri (2015-yil) Meyvezer o‘g‘lining burchagidan joy olib keladi.
Aytishlaricha, Floyd boksdagi ilk yirik g‘alabalarni qo‘lga kirita boshlaganida maktabni butunlay tashlab qo‘yadi, hatto uning karra jadvalini ham to‘liq bilmasligi aytiladi. Hozir Meyvezerning bu jadvalni bilishi yoki aksincha ekanligi noma’lum, ammo u tarixdagi eng boy ikki sportchining biri hisoblanadi.
Meyvezerning so‘zlariga ko‘ra, uning boyligi 2021-yilda 1,2 mlrd dollarga yetgan. Bokschining hech kimga o‘xshamasligi va agar kerak bo‘lsa, 50 yoshda ham yangi chaqiriqlarga (barcha sohalarda) tayyorligi hisobga olinsa, bu miqdorning yana oshishi va uning yangidan yangi qirralari ochilishiga shubha yo‘q.
Izoh (0)