Бухоро ва Қашқадарё вилоятларида фуқароларни ишга киритиб қўйишни ваъда қилиб, улардан пул ундирмоқчи бўлган шахслар қўлга олинди. Бу ҳақда Бош прокуратура ҳузуридаги департамент хабар берди.
Маълум қилинишича, департаментнинг Бухоро шаҳар бўлими томонидан ДХХнинг вилоят бошқармаси билан тезкор тадбир ўтказилган. Тадбирда О.У. исмли шахс фуқаро Ш.нинг ишончига кириб, уни гўёки юқори лавозимда ишловчи танишлари ёрдамида истеъмолчилар ҳуқуқларини ҳимоя қилиш бўлимига ишга жойлаштириб қўйишга ваъда бергани аниқланган. Бунинг эвазига у 1,5 минг доллар олган вақтида ашёвий далиллар билан ушланган.
Шунингдек, департаментнинг Қашқадарё вилояти бошқармаси томонидан ДХХ билан ҳамкорликда ўтказилган тезкор тадбирда З.Х. исмли шахс фуқаро И.нинг ишончига кириб, уни Ўзбекистон Миллий гвардияси тизимига ишга киритиб қўйиш эвазига 4 минг доллар олган вақтида ашёвий далиллар билан қўлга олинган.
Мазкур ҳолатлар юзасидан Жиноят кодексининг 168-моддаси (фирибгарлик) 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Бундан олдин Самарқандда Миллий гвардияга ишга киритиб қўйишни ваъда қилиб, 27 минг долларини ўзлаштирган фуқарога жиноят иши қўзғатилгани, Бухорода фуқарони Миллий гвардияга ишга қўйиш эвазига 2000 доллар олган шахслар ушлангани, Самарқандда ҳарбий олийгоҳлар ва Темурбеклар мактабига ўқишга киритишини айтиб, фуқаролардан қарийб 10 500 доллар пул олган аёл қўлга олингани тўғрисида хабар берилганди.
Мавзуга доир:
- Наманганда шифохонага ишга киритиб қўйиш учун 700 доллар сўраган ҳамшира ва мудир ўринбосари ушланди
- Самарқандда «Ўзбекистон темир йўллари»га ишга киритиб қўйиш учун 3 минг доллар пора олган темир йўлчи ушланди
- Бухорода фуқарони нефть заводига ишга киритиб қўйиш учун 2 минг доллар олган шахс ушланди
- Самарқандда ишга жойлаш учун пора олган мактаб директори ва шифокор қўлга олинди
Изоҳ (0)