Мисрнинг FlyEgypt авиакомпаниясига тегишли Boeing 737-86J самолёти 2021 йилнинг 26 май куни Тошкент шаҳридан қоидага хилоф равишда учиб ўтган эди. Ҳолат юзасидан изоҳ берган Ўзбекистон Транспорт вазирлиги Тошкент—Қоҳира йўналиши бўйича FEG 1402 қатновини бажараётган FlyEgypt авиакомпаниясининг рўйхат рақами SU TMG бўлган Boeing-737 русумли самолёти экипажи «Тошкент» аэропортидан парвозни амалга ошириш жараёнида нотўғри манёврни амалга оширган. Шундан сўнг, Миср экипажига «Ўзбекистон Республикасида фуқаро авиация ҳаво кемалари билан содир бўлган авиация ҳалокати ва инсидентларини текшириш қоидалари»га мувофиқ авиаҳодиса текширувини ўтказиш юзасидан комиссия тузилган.
Комиссия томонидан ҳолат бўйича текширув ишлари нима билан тугагани ҳақида маълумот олиш учун «Дарё» Транспорт вазирлигига сўров билан мурожаат қилди.
Транспорт вазирлиги ахборот хизмати раҳбари Наврўз Аширматовнинг маълум қилишича, ҳақиқатан ҳам Boeing-737 русумли самолёти экипажи жараёнида нотўғри манёврни амалга оширган.
«Ўзбекистон томони FlyEgypt авиакомпаниясининг рўйхат рақами SU TMG бўлган Boeing-737 русумли самолёти экипажига чора кўришни сўраб Миср авиация маъмуриятига хат юборган», – деди Транспорт вазирлиги вакили.
Вазирлик ахборотида FlyEgypt авиакомпанияси экипажи айнан қандай тартибни бузгани ва қандай чора кўрилиши ҳақида маълумот берилмаган.
Ўша вақтда ҳолат ижтимоий тармоқ фойдаланувчилари томонидан кенг муҳокамаларга сабаб бўлганди. Айримлар Тошкент аҳолисига «ҳамдардлик» билдирган бўлса, баъзилар бунинг учун мисрликларга қандай чора кўрилиши бўйича саволни ўртага ташланган.
«Уйимнинг устидан учиб ўтди, ғиштларим кўчиб тушай деди, қулаяпти деб ўйладим, Худо кўрсатмасин», «Ҳа, эшитилди, шаҳар марказига тушди деб ўйладим», «Уларнинг учиш ва қўниш борасидаги маълум коридорлари мавжуд, шаҳар марказида эса стратегик объектлар жойлашган, уни шунчаки уриб туширишлари мумкин» — деб ёзганди ижтимоий тармоқ фойдаланувчилари.
Эслатиб ўтамиз, Ўзбекистон ва Миср ҳукумати ўртасида тузилган ҳаво қатнови тўғрисидаги битим асосида Транспорт вазирлиги ҳузуридаги «Ўзавиация» агентлиги томонидан FlyEgypt авиакомпаниясига Ўзбекистонга мунтазам равишда авиақатновларни амалга ошириш учун 2021 йил 3 февралда 7-К-сонли рухсатнома берилган.
Изоҳ (0)