ДХХ ҳудудларда гиёҳванд моддалар савдосига чек қўйди (видео)

Давлат хавфсизлик хизмати ходимлари жойларда гиёҳванд моддалар савдосига қарши тезкор тадбирлар ўтказди, деб хабар бермоқда ЎзА.

Қайд этилишича, ДХХнинг Сурхондарё вилояти бўйича бошқармаси, Чегара қўшинлари ҳамда вилоят божхона бошқармаси ходимлари ҳамкорлигида тезкор тадбир ўтказилган. Унда Узун туманида яшовчи фуқаро (1991 йилда туғилган) давлат чегарасини ноқонуний кесиб ўтиб, Тожикистондан 5 килограмм 593 грамм опий моддасини мамлакатга олиб келган вақтида қўлга олинган.

Шунингдек, тезкор тадбир давом эттирилиб, унинг Узун туманида яшовчи жиноий шериги (1996 йилда туғилган) ҳамда ушбу модданинг буюртмачилари — Денов туманида яшовчи ака-ука (1985 ва 1990 йилларда туғилган) ҳам ушланган.

ДХХ Қашқадарё вилояти бўйича бошқармаси ходимлари вилоят ИИБ билан ҳамкорликда тезкор тадбир ўтказган. Унда эса Термиз шаҳрида яшовчи фуқаро (1969 йилда туғилган) ва унинг 2 нафар ўғли (1990 ҳамда 1992 йилларда туғилган) Cobalt автомашинасида Тошкент шаҳри томон кетаётган вақтида Чироқчи туманидаги «Умакай» ЙПХ масканида тўхтатилган.

Автомашина кўздан кечирилганда унинг мотор қисмига яшириб қўйилган 1 кг гашиш моддаси борлиги аниқланиб, тегишли тартибда расмийлаштириб олинган.

«Умакай» ЙПХ масканида қайд этилган яна бир ҳолатда Термиз—Тошкент йўналиши бўйича ҳаракатланаётган Cobalt автомашина тўхтатилиб текширилган. Натижада унда йўловчи сифатида кетаётган муқаддам икки маротаба гиёҳванд моддалар билан боғлиқ жиноят содир этгани учун судланган шахснинг (1959 йилда Денов туманида туғилган) ёнида 350 гр гашиш ва 65 гр опий моддалари борлиги аниқланган. Моддалар процессуал тартибда расмийлаштириб олинган.

Аниқланишича, учинчи шахслар томонидан Тожикистондан контрабанда йўли билан олиб ўтилган ушбу наркотиклар Тошкент шаҳрида сотилиши керак бўлган.

Фарғона туманида яшовчи муқаддам гиёҳванд моддалар билан боғлиқ жиноят содир этгани учун судланган фуқаро (1966 йилда туғилган) 426 гр гашиш моддасини Қирғизистондан контрабанда йўли билан олиб ўтиб, шундан 107 граммини Бувайда туманида яшовчи муқаддам судланган шахсга сотаётган вақтида уларнинг иккаласи ҳам қўлга олинган.

Шунингдек, унинг бошқарувидаги Cobalt автомашина салонига яшириб қўйилган наркотик модданинг қолган қисми ҳам аниқланиб, тегишли тартибда расмийлаштириб олинган.

Наманган вилоятида кузатилган ҳолатда эса Тошкент шаҳри томон ҳаракатланиб кетаётган автотранспорт воситаси Поп туманида жойлашган «Наманган мунтазам» ЙПХ масканида тўхтатилиб, кўздан кечирилган.

Натижада унда 2 минг 160 дона флаконда «Тропикамид» кучли таъсир қилувчи дори воситаси борлиги маълум бўлган ва процессуал тартибда олиб қўйилди. Аниқланишича, Қирғизистондан ноқонуний олиб ўтилган мазкур дори воситалари Наманган шаҳрида яшовчи муқаддам судланган шахсга (1985 йилда туғилган) тегишли бўлган.

Ҳозирда мазкур ҳолатлар бўйича жиноят ишлари қўзғатилган. Тергов ҳаракатлари олиб борилмоқда.