Misrning FlyEgypt aviakompaniyasiga tegishli Boeing 737-86J samolyoti 2021-yilning 26-may kuni Toshkent shahridan qoidaga xilof ravishda uchib o‘tgan edi. Holat yuzasidan izoh bergan O‘zbekiston Transport vazirligi Toshkent—Qohira yo‘nalishi bo‘yicha FEG 1402 qatnovini bajarayotgan FlyEgypt aviakompaniyasining ro‘yxat raqami SU TMG bo‘lgan Boeing-737 rusumli samolyoti ekipaji “Toshkent” aeroportidan parvozni amalga oshirish jarayonida noto‘g‘ri manyovrni amalga oshirgan. Shundan so‘ng, Misr ekipajiga “O‘zbekiston Respublikasida fuqaro aviatsiya havo kemalari bilan sodir bo‘lgan aviatsiya halokati va insidentlarini tekshirish qoidalari”ga muvofiq aviahodisa tekshiruvini o‘tkazish yuzasidan komissiya tuzilgan.
Komissiya tomonidan holat bo‘yicha tekshiruv ishlari nima bilan tugagani haqida ma’lumot olish uchun “Daryo” Transport vazirligiga so‘rov bilan murojaat qildi.
Transport vazirligi axborot xizmati rahbari Navro‘z Ashirmatovning ma’lum qilishicha, haqiqatan ham Boeing-737 rusumli samolyoti ekipaji jarayonida noto‘g‘ri manyovrni amalga oshirgan.
“O‘zbekiston tomoni FlyEgypt aviakompaniyasining ro‘yxat raqami SU TMG bo‘lgan Boeing-737 rusumli samolyoti ekipajiga chora ko‘rishni so‘rab Misr aviatsiya ma’muriyatiga xat yuborgan”, – dedi Transport vazirligi vakili.
Vazirlik axborotida FlyEgypt aviakompaniyasi ekipaji aynan qanday tartibni buzgani va qanday chora ko‘rilishi haqida ma’lumot berilmagan.
O‘sha vaqtda holat ijtimoiy tarmoq foydalanuvchilari tomonidan keng muhokamalarga sabab bo‘lgandi. Ayrimlar Toshkent aholisiga “hamdardlik” bildirgan bo‘lsa, ba’zilar buning uchun misrliklarga qanday chora ko‘rilishi bo‘yicha savolni o‘rtaga tashlangan.
“Uyimning ustidan uchib o‘tdi, g‘ishtlarim ko‘chib tushay dedi, qulayapti deb o‘yladim, Xudo ko‘rsatmasin”, “Ha, eshitildi, shahar markaziga tushdi deb o‘yladim”, “Ularning uchish va qo‘nish borasidagi ma’lum koridorlari mavjud, shahar markazida esa strategik obyektlar joylashgan, uni shunchaki urib tushirishlari mumkin” — deb yozgandi ijtimoiy tarmoq foydalanuvchilari.
Eslatib o‘tamiz, O‘zbekiston va Misr hukumati o‘rtasida tuzilgan havo qatnovi to‘g‘risidagi bitim asosida Transport vazirligi huzuridagi “O‘zaviatsiya” agentligi tomonidan FlyEgypt aviakompaniyasiga O‘zbekistonga muntazam ravishda aviaqatnovlarni amalga oshirish uchun 2021-yil 3-fevralda 7-K-sonli ruxsatnoma berilgan.
Izoh (0)