21 февраль куни Самарқанд вилояти Жомбой туманида жойлашган Зарафшон миллий боғининг учинчи қисми ҳудудида ёнғин содир бўлди. Бу ҳақда вилоят Экология ва атроф-муҳитни муҳофаза қилиш бошқармасига таяниб, Zarnews хабар берди.
Маълум қилинишича, ёнғин оқибатида 0,25 гектар майдондаги сув тол ва малина туплари зарар кўрган. Олов воқеа жойига етиб келган ёнғин-қутқарув бригадалари томонидан тезкорлик билан ўчирилган.
Айни вақтда вилояти Экология ва атроф-муҳитни муҳофаза қилиш бошқармаси тегишли идоралар билан биргаликда ҳодиса юзасидан қонун ҳужжатларида белгиланган тартибда текширув ўтказмоқда.
Эслатиб ўтамиз, Жиззах вилоятининг Зомин тумани «Дуоба» қишлоқ фуқаролар йиғини Ўриклисой қишлоғи яқинидаги ўрмон ҳудудларида 2021 йил 1 август куни йирик ёнғин юз берганди. Соат тахминан 10:40 да бошланган ёнғин салкам саккиз соатдан сўнг ўчирилган. ФВВ маълумотларига кўра, 80 гектар майдонда қуруқ ўт ва дарахтлар ёнган. Оловни ўчиришга 1600 га яқин одам жалб этилган. Кейинроқ президент Шавкат Мирзиёев ёнғин «бир бойваччанинг ўғли» сабаб содир этилганини маълум қилганди.
Изоҳ (0)