Европада «Юнис» довули 16 кишининг ҳаётига зомин бўлди (видео)

Европанинг бир қанча давлатларига урилган «Юнис» довули 16 кишининг ўлимига сабаб бўлди, деб ёзмоқда BBC News.

Хусусан, Нидерландияда тўрт киши, Польшада ҳам тўрт киши ҳалок бўлган. Буюк Британияда уч нафар, Германия ва Бельгияда икки нафардан, Ирландияда бир киши ёмон об-ҳаво қурбони бўлган. Ўлимларнинг аксарияти дарахтлар қулаши ва кучли шамолда конструкцияларнинг учиб келиб урилиши билан боғлиқ.

Euronews маълумотларига кўра, довул Ирландиядан Буюк Британияга, сўнгра Франция шимоли ва Бенилюкс мамлакатлари орқали Дания ва Германияга кўчган (у ерда довулга Зейнеп номи берилган). Довул электр узатиш линияларининг узилишига, биноларнинг вайрон бўлишига ва соҳилбўйи ҳудудларини сув босишига олиб келган.

Довулнинг кучли зарбаси айниқса Буюк Британияга урилган: Лондонда об-ҳаво ёмонлашишининг қизил даражасидан огоҳлантириш эълон қилинди. Sky News маълумотларига кўра, Буюк Британияда 18 февраль куни кузатилган довул туфайли 1,2 миллион киши электр таъминотидан узилган, улардан 155 минг нафари ҳалигача электрсиз қолмоқда.

18 февраль куни Гатвик, Xitrou ва Манчестер аэропортларида 500 дан ортиқ рейслар бекор қилинган эди. 20 февраль куни The Guardian аэропортлар қайта очилаётганини хабар қилди.

20—21 февраль кунлари Буюк Британияда кучли шамоллардан огоҳлантириш режими кучда қолмоқда. Келгуси ҳафта охиригача мамлакатда шамолли об-ҳаво, ёғингарчилик кутилмоқда.