Россия ва Беларусь Донбассдаги вазият кескинлашгани муносабати билан Қуролли кучларининг ҳужумларга жавоб қайтариш маҳоратини биргаликда текшириш бўйича машғулотлар муддатини узайтиради. Бу ҳақда Беларусь Мудофаа вазирлигига таяниб, Meduza хабар берди.
Вазирлик раҳбари Виктор Хрениннинг сўзларига кўра, текширув давомида машғулотларнинг олдинги босқичида ёритилмаган мудофаа босқичлари «пухта ишлаб чиқилади».
«Машғулотларнинг бош мақсади ўзгаришсиз қолди – бу умумий чегараларимиз яқинида ғаразли ниятдаги ҳарбий тайёргарликка адекват жавоб бериш ва кескинликни пасайтириш чораларини кўришдан иборат», — дейди Хренин.
10 февралда Беларусь ҳудудида бошланган «Иттифоқчилик жасорати» қўшма машғулотлари 20 февралда тугаши керак эди.
Қўшма Штатлар Россия бу машқлардан Украинага бостириб кириш учун фойдаланиши мумкинлигини даъво қилганди. Москва буни рад этиб, ҳарбийлар машғулотлардан сўнг Россия Федерацияси ҳудудига олиб кетилишини таъкидлаган.
Мавзуга доир:
- Россия Ғарбий ҳарбий округ қўшинлари машғулотлардан қайтганини эълон қилди. АҚШ Россия кучларининг чекинганига ишонмаяпти
- Лукашенко: Донбассда ҳарбий ҳаракатлар бошланса, Беларусь армияси «Россия армиясидек» ҳаракат қилади
- ФТ: Путин Макронга Беларусдаги машғулотлардан сўнг Украина чегараларидан 30 минг қўшинини олиб кетишга ваъда берди
Изоҳ (0)