Буюк Британия қироличаси Елизавета II да коронавирус аниқланди. Бу ҳақда Букингем саройига таяниб, BBC хабар берди.
95 ёшли қиролича COVID-19 нинг енгил симптомларини бошдан кечирмоқда. Келгуси ҳафтадаёқ у ўз вазифаларига киришишни режалаштирмоқда.
17 февраль, пайшанба куни Британия қироличаси оёқларидаги муаммолардан шикоят қилганди. У Мудофаа вазирлиги котибиятининг янги раҳбари ва ундан олдинги раҳбар билан ҳассага суяниб йиғилиш ўтказган. Улар билан суҳбат чоғида монарх «ҳаракатлана олмаётганини» айтган.
Елизавета II да коронавирус тўнғич ўғли ва тахт вориси шаҳзода Чарльз билан мулоқотда бўлгандан сўнг аниқланди. Шаҳзода Чарльзга ўн кун аввал коронавирус ташхиси қўйилганди.
BBC ўз мухбирига таяниб, қиролича инфекцияга қарши «мутлақо» тўлиқ эмланганини хабар қилди. 2021 йил январь ойида қиролича вакцинанинг битта дозасини олгани ҳақида эълон қилинганди. Бир ой ўтгач, у фуқароларини ҳам вакцина олишга чақирганди.
Февраль бошида Дания қироличаси Маргрете II ва Испания қироли Филипп VI да ҳам коронавирус аниқлангани тўғрисида хабар берилганди.
Изоҳ (0)