Қўқонда «Ҳизб ут-Таҳрир» диний-экстремистик ташкилоти тарафдорининг фаолиятига чек қўйилди.
ИИВ Терроризм ва экстремизмга қарши курашиш бош бошқармаси ахборотига кўра, муқаддам «Ҳизб ут-Таҳрир» сафида фаолият олиб боргани учун 2000—2004 ва 2007—2013 йилларда жазо муддатини ўтаб чиққан М.А. (1979 йилда туғилган) жиноий фаолиятини тиклаб, Facebook орқали экстремистик ғояларни тарғиб қилиш ва шу йўл билан «таҳрирчилар» сафини кенгайтиришга қаратилган ноқонуний хатти-ҳаракатларни содир этган.
М.А. Facebook’даги электрон манзили орқали виртуал дўстларига «Ҳизб ут-Таҳрир» диний-экстремистик ташкилотининг аудио-видео материалларини, шунингдек, ташкилотнинг фаол виртуал ёлловчиси ва тарғиботчиси «Маҳмуд Абдулмўмин» тахаллусли Маҳмуджон Холдаровнинг (1980 йилда Қирғизистонда туғилган) маърузаларини тарқатиб келгани аниқланган.
Хабарда айтилишича, ҳозирда ушбу шахсга нисбатан Жиноят кодексининг тегишли моддалари билан жиноят иши қўзғатилиб, тергов-суриштирув тадбирлари амалга оширилмоқда.
Эслатиб ўтамиз, 2021 йилнинг сентябрида Тошкентда «Ҳизб ут-Таҳрир»га аъзолиги учун жазони ўтаб чиққан 10 киши яна шу ташкилотга аъзо бўлгани учун қўлга олинганди. Ўша йилнинг декабрида Андижонда ушбу диний-экстремистик ташкилоти аъзолиги учун жазони ўтаб чиққан 12 киши яна унга аъзо бўлгани учун қўлга олинганди.
Изоҳ (0)