Qo‘qonda “Hizb ut-Tahrir”ga a’zoligi uchun ikki marta qamalib chiqqan kishi yana shu jinoyati uchun qo‘lga tushdi

Qo‘qonda “Hizb ut-Tahrir” diniy-ekstremistik tashkiloti tarafdorining faoliyatiga chek qo‘yildi.

IIV Terrorizm va ekstremizmga qarshi kurashish bosh boshqarmasi axborotiga ko‘ra, muqaddam “Hizb ut-Tahrir” safida faoliyat olib borgani uchun 2000—2004 va 2007—2013-yillarda jazo muddatini o‘tab chiqqan M.A. (1979-yilda tug‘ilgan) jinoiy faoliyatini tiklab, Facebook orqali ekstremistik g‘oyalarni targ‘ib qilish va shu yo‘l bilan “tahrirchilar” safini kengaytirishga qaratilgan noqonuniy xatti-harakatlarni sodir etgan.

M.A. Facebook’dagi elektron manzili orqali virtual do‘stlariga “Hizb ut-Tahrir” diniy-ekstremistik tashkilotining audio-video materiallarini, shuningdek, tashkilotning faol virtual yollovchisi va targ‘ibotchisi “Mahmud Abdulmo‘min” taxallusli Mahmudjon Xoldarovning (1980-yilda Qirg‘izistonda tug‘ilgan) ma’ruzalarini tarqatib kelgani aniqlangan.

Xabarda aytilishicha, hozirda ushbu shaxsga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov-surishtiruv tadbirlari amalga oshirilmoqda.

Eslatib o‘tamiz, 2021-yilning sentabrida Toshkentda “Hizb ut-Tahrir”ga a’zoligi uchun jazoni o‘tab chiqqan 10 kishi yana shu tashkilotga a’zo bo‘lgani uchun qo‘lga olingandi. O‘sha yilning dekabrida Andijonda ushbu diniy-ekstremistik tashkiloti a’zoligi uchun jazoni o‘tab chiqqan 12 kishi yana unga a’zo bo‘lgani uchun qo‘lga olingandi.