Ўзбекистонда 2021 йилда юз берган йўл-транспорт ҳодисалари оқибатида неча киши ҳалок бўлгани маълум қилинди

Ўзбекистонда 2021 йилда йўл-транспорт ҳодисалари оқибатида жами 2426 киши ҳалок бўлди. Бу ҳақда Ички ишлар вазирлиги ахборот хизмати хабар берди.

Маълум қилинишича, 2021 йилнинг январь—декабрь ойларида жами 10 001 та йўл-транспорт ҳодисалар содир этилган бўлиб, улар оқибатида 9230 киши жароҳат олган.

ЙТҲларнинг 4698 таси пиёдалар, 1621 таси болалар, 1075 таси велосипедчилар, 84 таси мотоциклчилар билан содир бўлган. Авариялар содир этган ҳайдовчиларнинг 268 нафари аёллар бўлса, 9733 нафари — эркаклар.

Шунингдек, ЙТҲларнинг 20,1 фоизи ҳаракатни ташкил этишдаги муаммолар, 20,1 фоизи белгиланган тезликка риоя қилмаслик, 13,8 фоизи пиёдалар ўтиш жойи белгиланмаган жойдан кесиб ўтиш, 9,1 фоизи ҳайдовчининг тажрибасизлиги, 5-фоизи болаларни қаровсиз қолдириш, 1,4 фоизи эса маст ҳолда рулга ўтириш оқибатида келиб чиққан.

Йўл-транспорт ҳодисаларининг деярли 3626 таси давлат аҳамиятидаги (минтақалараро), 2099 таси маҳаллий, 1697 таси халқаро аҳамиятга эга бўлган йўлларда юз берган.

Бир йил ичида энг кўп йўл-транспорт ҳодисалари Фарғона вилоятида содир бўлган — тегишли даврда 1469 та ЙТҲ қайд этилган. Кучли учликдан Тошкент вилояти (1336 та) ва Тошкент шаҳри (1073 та) бормоқда.

Эслатиб ўтамиз, Ўзбекистонда 2020 йилда йўл-транспорт ҳодисалари оқибатида жами 1962 киши, 2019 йилда эса 2094 киши ҳалок бўлган эди.