Ижтимоий тармоқларда сўмнинг муомалага киритилганига 20 йил тўлиши муносабати билан 20 рақами туширилган банкнота видеоси тарқалди. Марказий банк мазкур ҳолатга муносабат билдириб, тасвирлардаги намуна банк томонидан муомалага чиқарилган пул белгиси ҳисобланмаслигини маълум қилди.
«Ўзбекистон Республикасининг Марказий банки тўғрисида»ги қонунга асосан Ўзбекистон ҳудудида қонуний тўлов воситаси сифатида пул белгилари фақат Марказий банк томонидан муомалага чиқарилади. Янги намуналардаги пул белгилари муомалага чиқарилиши тўғрисидаги хабар, шунингдек, уларнинг тавсифлари Марказий банк томонидан оммавий ахборот воситаларида эълон қилинади.
Таъкидланишича, ижтимоий тармоқларда тарқалган ушбу намуна Марказий банк томонидан эмас, балки «Давлат белгиси» корхонаси томонидан 2014 йилда юбилей сана муносабати билан корхонанинг реклама маҳсулоти (сувенир) сифатида чиқарилган. Мазкур банкнот ҳеч қандай қиймат ўлчовига эга эмас (унда сўм ёзуви қайд этилмаган), муомала ва тўлов воситаси сифатида фойдаланишга мўлжалланмаган.
Шу сабабли Марказий банк ижтимоий тармоқ фойдаланувчиларидан аҳоли орасида ҳар хил саволлар ва тушунмовчиликларни келтириб чиқармаслик мақсадида асоссиз ахборотларни тарқатмаслик сўраган.
«Дунёдаги барча банкнот чоп этувчи компаниялар томонидан янги ҳимоя элементлари жорий этилгани ёки бошқа ишлаб чиқариш янгиликлари билан таништириш мақсадида, бирор юбилей сана ёки компания фаолиятига алоқадор воқеага бағишлаб фақат рақам қўйилган, валюта номи қайд этилмаган банкнотлар чоп этиб борилади ва улар корхона фаолиятини рекламаси учун мўлжалланган бўлади», — дейилади муносабатда.
Эслатиб ўтамиз, 2021 йилда Ўзбекистонда муомалада бўлган 7 та банкнотадан 6 таси янгиланди. Хусусан, ўтган йилнинг 27 декабридан 50 000 ва 100 000 сўмлик, 14 июнидан 2 000 ва 20 000 сўмлик, 26 августидан 5 минг ва 10 минг сўмлик банкноталар янги кўринишда муомалага чиқарилди.
Изоҳ (0)