Шавкат Мирзиёев ҳузурида 2022 йилда божхона маъмурчилигини янада такомиллаштириш ва соҳани коррупциядан холи тизимга айлантириш бўйича устувор вазифалар юзасидан йиғилиш бошланади. Бу ҳақда давлат раҳбарининг матбуот котиби Шерзод Асадов маълум қилди.
Йиғилишда беш йиллик Тараққиёт стратегиясида экспортни 30 миллиард долларга, хорижий туристлар сонини 7 миллионга етказиш белгилаб олинган.
«Бу катта марралар. Бунинг учун, божхона тизими пастдан бошлаб, энг юқори бўғингача ўзгариши керак. Топшириғимга кўра, қўмитанинг янги раиси бевосита постларда ходимлар, аҳоли ва тадбиркорлар билан юзма-юз гаплашиб, ҳар бир масалани ичига кириб ўрганди.
Вилоят ҳокимлари бир нарсани аниқ тушуниши керак. Божхона постлари давлатимиз юзи, биринчи таассурот ҳам айнан божхонадан бошланади. Божхона постига қараб, ҳар бир ҳокимнинг маданиятига баҳо берилади. Улар атрофида равон йўллар, экилган манзарали дарахт ва гуллар, аҳоли учун қулай шароитлар бўлиши шарт», — деган Шавкат Мирзиёев.
Давлат раҳбарининг сўларига кўра, беш йилда Ўзбекистоннинг ташқи савдо айланмаси 2 баробарга — 2016 йилдаги 24 миллиард доллардан 2021 йилда 42 миллиард долларга ошган.
«Божхона тизими мамлакатимизни жаҳон иқтисодиётига боғлайдиган кўприк ҳисобланади. Бу тизим тўғри ва очиқ-ошкора ишламаса, тадбиркорлик, инвестицияга тўсиқ бўлади ҳамда аҳолининг норозилигини келтириб чиқаради», — дея таъкидлаган президент.
Шунингдек, йиғилишда мамлакатдаги айрим божхона постлари ичимлик ва электр энергияси билан таъминланмагани, уларга олиб борувчи йўллар таъмирталаб экани, бу аҳолининг ҳақли эътирозларига сабаб бўлаётгани қайд этилган. Шу муносабат билан Президент ҳар бир чегара божхона постида манзилли ишларни амалга ошириш вазифасини қўйган.
Ҳокимларга авваламбор йўловчиларнинг 90 фоизи, юк автомобилларининг 70 фоизи ўтадиган 22 та чегара постига олиб борувчи йўллар ва бошқа инфратузилмани яхшилаш юзасидан кўрсатма берилган. Шунингдек:
- «Дўстлик» ва «Яллама» постлари олди ҳудудларида ташқи савдо марказларини ишга тушириш;
- «Олот» постига туташ ҳудудда логистика, сервис ва бошқа инфратузилма объектларини ташкил этишни бошлаш;
- 1 апрелга қадар Самарқанд халқаро аэропортида, кейинчалик барча аэропортларда «божхоначисиз назорат» тизимини ишга туширишга топшириқ берилган.
Изоҳ (0)