Байден Украина масаласида видеомурожаат билан чиқиш қилди

АҚШ президенти Жо Байден 15 февраль куни Украина атрофидаги вазият юзасидан видеомурожаат йўллади. Унинг мурожаати «Америка овози» томонидан трансляция қилинди.

АҚШ давлат раҳбари энг биринчи навбатда мамлакатнинг Европада хавфсизликни таъминлаш йўналишида Россия билан дипломатик мулоқотга, шунингдек, Украинага нисбатан зўравонликларга кескин жавоб қайтаришга тайёрлигини таъкидлади.

Жумладан, Оқ уй раҳбари Вашингтоннинг Москва билан хавфсизлик йўналишида ёзма келишувлар тузишга тайёрлигини билдирди. Шу билан бирга, Қўшма штатларнинг Украинага ракеталарини жойлаштирмагани ва жойлаштирмаслиги, бироқ НАТО эшикларини ҳам ёпмаслигини айтиб ўтди.

Байден Россиянинг Украина чегарасидаги ҳарбийларнинг бошқа манзилга ўтказилишини олқишлади, аммо ушбу ахборот ҳали расман ўз тасдиғини топмаганини қайд этди. Унинг сўзларига кўра, бугунги кунда Украина чегарасида 150 мингга яқин Россия аскарлари бор.

АҚШ президенти Россия Украинага ҳужум қилса, Вашингтон ва унинг иттифоқчилари Москвага нисбатан ўта кучли – экспорт назорати, молия соҳаларида санкциялар қўллаши, «Шимолий оқим - 2» газ қувури ҳам тўхтатилиши ҳақида огоҳлантирди.

«Украинага ҳужум ўз оёғини тўппонча билан яралашга тенг ҳаракат. Ғарб бирлашади», — деган Байден.

Шунингдек, Жо Байден уруш бошланадиган бўлса, Украинага ҳарбийларни юбормаслиги, лекин Украинадаги америкаликларга талафот етса, Вашингтон бунга кескин ва шафқатсиз жавоб беришини ваъда қилди.

«Россия ва АҚШ олдида танлов бор. Муаммони уруш орқали эмас, аксинча дипломатик йўл билан ҳал этиш керак», — дея қўшимча қилган Байден.

Эслатиб ўтамиз, 11 февралда Байден АҚШ иттифоқчилари билан музокаралар вақтида Россиянинг 16 февраль куни Украинага бостириб кириши мумкинлиги ҳақида огоҳлантирган. Кремль ушбу ахборотни инкор қилган ва Ғарбни Европада кескинликни ошириш учун мислсиз кампанияни (провокация ва фитна) бошлашда айблаган.

15 февраль куни Россия мудофаа вазирлиги Ғарбий ва Жанубий ҳарбий округларнинг ҳарбий бўлинмалари ўқув машғулотларини якунлаб ҳарбий қисмларга қайтаётганини эълон қилган. Бироқ ушбу маълумот ҳали расман ўз тасдиғини топмаган.

Аввал АҚШ Россиянинг Украина билан чегара ҳудудидан ҳарбий қўшинларнинг бир қисмини бошқа ерга кўчирилганини текшириб, барчасига ишонч ҳосил қилмоқчилиги, Путин Россиянинг Украина билан уришишни истамаслигини маълум қилгани ҳақида хабарлар берилган.