АҚШ Геология хизмати (USGS) мутахассислари Ўзбекистон Давлат геология ва минерал ресурслар қўмитаси билан биргаликда республикадаги сланец гази ва нефть захираларини ўрганади. Бу ҳақда «Дунё» ахборот агентлиги хабар бермоқда.
Унга кўра, Ўзбекистоннинг АҚШдаги элчиси Жавлон Ваҳобов ва АҚШ Геология хизмати катта илмий ходими Ингрид Верстратен ўртасида музокаралар бўлиб ўтган. Натижада америкалик мутахассислар ва Ўзбекистон геологлари ҳам келишувга эришган.
«Нефть ва газ ресурсларини қидиришга ихтисослашган USGS гуруҳи Самарқанд, Жиззах ва Сурхондарё вилоятларидаги сланец нефти ва сланец газининг потенциал конларини аниқлаш мақсадида 2022 йилнинг май ойида Ўзбекистонга ташриф буюришни режалаштирмоқда», — дейилади хабарда.
Шунингдек, жорий йилнинг ёзида америкалик экспертлар гуруҳи ўзбекистонлик ҳамкасблари билан биргаликда Ўзбекистоннинг тоғ тизмаларида геологик тадқиқотлар ва минерал ресурсларни қидириш ишларини олиб бориши хабар қилинган.
Изоҳ (0)