2021 йилнинг технологик тенденцияларининг аксарияти COVID-19 тарқалиши туфайли амалга оширилди. Кўпчилик пандемия тез орада тугашини кутганди. Янги омикрон штаммининг пайдо бўлиши вирус ҳеч қаерга кетмаслигини кўрсатди. Yandex компаниясининг стратегик маркетинг бўйича директори Андрей Себрант Forbes нашрида 2022 йилда ковид таъсирида фаол жорий этиладиган технологиялар ҳақида гапириб ўтди.
Коронавирус чекловлари остида ўтган 2021 йил одамларни вирус билан мослашиб яшашга мажбур қилди. Йил бошида эмлашнинг юқори фоизли кўрсаткичлари пандемия тез орада унутилиши мумкинлигига умид уйғотганди. Аммо омикрон одамларда тезда ҳушёрлик уйғотди ва вирус таҳдиди биз билан ҳали узоқ қолишига ишора қилмоқда.
Барқарор бизнес ва умуман ижтимоий ҳодисаларни режалаштириш ҳар қандай вақтда ҳокимият томонидан одатий равишда киритилиши мумкин бўлган чекловларни ҳисобга олишни талаб қилди. Пандемия бутун дунё бўйлаб миллиардлаб одамларнинг одатлари ва психологиясини тубдан ўзгартирди.
Gartner технологик тадқиқотлар маркази томонидан эълон қилинган тенденция соҳаларининг 25 фоизи бизнеснинг мослашувини акс эттирмоқда. Бизнеснинг омон қолишини таъминлаш учун инсон омилини камайтириш муҳим аҳамиятга эга. Инсон аралашувисиз ишлай оладиган ҳар қандай соҳа бундай режимга тайёр бўлиши керак.
Ўзиюрар таксилар
2021 йилда биз турли мамлакатларда ўзи юрар автотранспорт воситаларидан фойдаланган ҳолда синовлар ёки тижорат лойиҳалари амалга оширилганини кўрдик. «Озиқ-овқат етказиб бериш келажаги» дея қаралаётган роботлар бундай ном билан аталаши бежиз эмас. Зарурий товарларни ташиш биринчи навбатда инсон курьерларидан мустақил бўлиши кераклиги таъкидланмоқда.
Маҳаллий йўловчиларни ташиш соҳасида ҳам худди шундай манзара кузатилди. Учувчисиз таксиларнинг дастлабки лойиҳалари муваффақиятли ишга туширилди. Хитойнинг баъзи ҳудудларида тегишли хизматларни кўрсатиш учун лицензиялар берилди.
Waymo ўзиюрар автомобиллари йўловчиларни Сан-Францискода ташишни бошлади. Бундай тажриба Россияда ҳам кузатилди. 2022 йилда ўзиюрар таксиларнинг синов географиясини кенгайишини кутишимиз мумкин.
Юқори технологияли рақобатчилар фақат автомобиль ҳайдовчилари орасида пайдо бўлмайди. 2022 йилда логистика соҳасида биринчи автоматлаштирилган юк ташиш амалга оширилиши кутилмоқда. Бу фақат қуруқликдаги транспорт билан чекланмайди. Дунёнинг бир қанча мамлакатларида юкларни учувчисиз етказиб бериш синовдан ўтказилмоқда. АҚШда ушбу технология Amazon ва Walmart томонидан ишлаб чиқилмоқда.
2022 йил транспорт саноати учун жуда гавжум йил бўлишини ишонч билан айтишимиз мумкин. Одамлар ва юкларни қуруқлик, сув ва ҳаво орқали ташишнинг автоматлаштирилиши бутун транспорт инфратузилмасини қайта қуришни талаб қилади.
Дунёни ўзгартириши кутилаётган Меtaverse
Меtaverse атамаси «меtа» ва «universe» сўзларидан келиб чиққан. Меtaverse — виртуал ҳақиқат тажрибасидан фойдаланиш имконини берувчи онлайн 3D дунё.
Facebook ва Instagram эгаси Марк Цукерберг ўтган йили интернет келажаги сифатида Метаверсе ҳақида баёнот бера бошлади. Кейинроқ Facebook номини Меtа деб ўзгартирди.
Меtaverse’ни қуришга бағишланган янги компания стратегияси ишлаб чиқилди. Шу вақтгача фақат компьютер ўйинлари ва фильмлар билан боғлиқ деб ҳисобланган концепция бутун интернет ривожланишининг кейинги даражаси сифатида кенг муҳокама қилина бошлади.
Меtа (аввалги Facebook) учун мобил қурилмалардаги ахборотни назорат қилиш учун учинчи томон платформаларига (Google ва Apple) ишониб қолишни тўхтатиш жудаям муҳимдир.
Меtaverse’га Microsoft компаниясидан ҳам қизиқиш борлиги учун бу соҳани тўлиқ монополия бўлди деёлмаймиз. Бозорнинг салоҳияти 1 триллион долларга баҳоланаётгани сабабли кураш қизғин кечмоқда.
Технология ва иқлим
2022 йилги технология тенденцияларига катта таъсир кўрсатиши кутилаётган яна бир воқеа — бу иқлим ўзгариши бўйича COP26 глобал саммити.
Саммитда радикал қарорлар қабул қилинмаган бўлса-да, дунёнинг энг йирик иқтисодчилари қазиб олинадиган углеводородларни қазиб олиш ва улардан фойдаланишни қисқартириш, ўрмонларнинг кесилишини кескин камайтиришга ваъда беришди.
Транспортни чиқиндисиз ёқилғига ўтказиш ва бошқа чора-тадбирларга ҳар йили ўнлаб миллиард доллар сармоя киритилиши ҳам устувор вазифалардан бири сифатида кўрилмоқда
Йирик глобал корпорациялар ҳам иқлим кун тартибини ишлаб чиқишда фаол иштирок этмоқда. Шунинг учун 2022 йилда биз иқлимга мос технологиялар соҳасида кўплаб тажрибалар ва янги ёндашувларни кутишимиз мумкин.
Кўриниб турибдики, транспорт саноати автоматлаштирилади ва иқлимга мос келувчи янги электр двигателлари ишлаб чиқилади.
Изоҳ (0)