«Урганчда яшаётганимда ўзимни АҚШнинг кўп жойларига қараганда хавфсизроқ ҳис қилдим» — Ўзбекистонда бир йил яшаган Флорида университети битирувчиси

Fulbrayt гранти лауреати Каролин Меса учун 2021 йил Марказий Осиёда Ўзбекистоннинг қишлоқ жойларида инглиз тили ва компьютер технологияларини ўргатиш билан ўтди.

«Бу дунёнинг нариги томонидаги одамларга америкалик бўлиш нимани англатишини ҳис қилдириш ва АҚШга ижобий нуқтаи назарни оширишнинг бир усули. Fulbrayt бу глобал миссияда ёрдам бериш имкониятидир», — дейди Каролин Меса. 

Каролин Меса Florida Gulf Coast University’нинг 2016 йилдан бери биринчи Fulbrayt гранти совриндори бўлди. 

«Урганчда яшаётганимда ўзимни АҚШнинг кўп жойларига қараганда хавфсизроқ ҳис қилдим, Ўзбекистон жуда хавфсиз жой. Менга кўрсатилган меҳмондўстлик эса тенгсиз эди. У ерда ўртача иш ҳақи ойига 100 дан 200 долларгача, лекин одамлар жуда очиқкўнгил. Мен учрашган одамлар музлатгичидаги ҳамма нарсасини менга беришни хоҳлашарди», — дея айтиб ўтди Меса.

Месанинг Fulbrayt муддати 2020 йилнинг кузида бошланиши режалаштирилган эди, аммо глобал пандемия саёҳатни кечиктирди.

Меса ўзбек тилини етти ҳафталик интенсив курсда ўрганган, бироқ Урганч аҳолиси у ўзлаштирган тилдан фарқли шевада гаплашгани сабаб қийналганини айтиб ўтди. Ўзбек тили унинг тўртинчи тили эди.

«Биз ўзимизга ишонганимиздан кўра кўпроқ мослашувчанмиз», — дейди Каролин. 

Каролин Меса Fulbrayt ўқитувчиси сифатида Урганч давлат университетида ишлайди. Унинг вазифаси инглиз тили дарсларини ўтиш, талабаларига онлайн тарзда қандай изланишлар олиб боришни кўрсатиш ва конференцияларда ахборот технологияларини синфларга киритиш бўйича нутқ сўзлашдан иборат эди. Меса ҳаттоки анъанавий ўзбек рақсларини ҳам ўрганди.

«Ёш ўзбек қизлари 20 ёшда турмуш қуриш ва фарзанд тарбияси каби маданий удумларга дуч кеилишади. Мен улар билан пойтахтда мавжуд бўлган амалиёт дастурлари ҳақида кўплаб имкониятларни ўртоқлашдим, лекин кўп шогирдларим ўқишга қабул қилинган тақдирда ҳам ота-оналари рухсат бермасликларини айтишади», — дейди Каролин Меса.