Расмий ташриф билан келган Иордания подшоҳи Абдулла II ибн ал-Ҳусайн 26 август куни Шавкат Мирзиёев ҳамроҳлигида Ўзбекистонда ишлаб чиқарилаётган экспортбоп маҳсулотлар кўргазмаси билан танишди.
Президент матбуот хизматининг маълум қилишича, Самарқанд шаҳридаги Конгресс марказида хорижий бозорлар учун халқаро стандартларга жавоб берадиган кенг турдаги юқори сифатли маҳсулотлар кўргазмага қўйилган.
Олий мартабали меҳмонга тоғ-кон, фармацевтика, кимё, тўқимачилик, заргарлик саноати, қишлоқ хўжалиги ва ахборот технологиялари каби соҳалардаги технологик босқичлар, ишлаб чиқариш қувватлари, инновациялар ва қўлланилаётган энг илғор ускуналар ҳақида батафсил маълумот берилди.
Экспозициядан юқори қўшилган қийматга эга тайёр саноат маҳсулотлари намуналари: дори воситалари, тиббий асбоб-ускуналар, минерал ўғитлар, тўқимачилик, трикотаж ва заргарлик буюмлари, ҳунармандчилик маҳсулотлари, IT ечимлари ва бошқалар ўрин олган.
Иордания етакчиси Ўзбекистон маҳсулотлари ва саноат салоҳиятини юксак баҳолади. Давлат раҳбарлари етакчи корхоналар кооперациясини кенгайтириш, ўзаро тажриба алмашиш ва технологиялар трансферини амалга ошириш муҳимлигини таъкидлади.
Тайёр саноат маҳсулотлари кўргазмасидан лавҳалар
Иордания подшоҳининг Ўзбекистонга ташрифи
Иордания подшоҳи Абдулла II ибн ал-Ҳусайн Ўзбекистон президенти таклифига биноан 25 август куни илк бор давлат ташрифи билан Ўзбекистонга келди. Уни Самарқанд шаҳри аэропортида Шавкат Мирзиёев кутиб олди. Шу куни улар биргаликда Самарқанд шаҳрининг тарихий обидалари, жумладан, Амир Темур мақбараси, Мирзо Улуғбек, Шердор ва Тиллакори мадрасаларидан иборат Регистон мажмуаси билан танишди. Самарқанд халқаро туризм марказидаги “Боқий шаҳар” тарихий-этнографик мажмуасини бориб кўрди.
26 август куни Самарқанд шаҳридаги Конгресс маркази биноси олдидаги майдонда Иордания подшоҳини тантанали кутиб олиш маросими ўтказилди. Бугун Ўзбекистон-Иордания саммитининг асосий тадбирлари, шу жумладан олий даражадаги музокаралар бўлиб ўтади. Мулоқотда сиёсий, савдо-иқтисодий ва инвестициявий ҳамкорликни ривожлантириш масалаларини кўриб чиқиш режалаштирилган.
Изоҳ (0)