Австралия ва Канада Украинадаги вазият сабаб Киевдаги элчихонасини бошқа шаҳарга кўчирмоқда

Австралия ташқи ишлар вазири Марис Пейн Россия-Украина чегарасидаги вазият кескинлашгани сабабли мамлакат элчихонаси вақтинчалик Киевдан Украинанинг Львов шаҳрига кўчирилишини эълон қилди. Бу ҳақда «Интерфакс» хабар берди.

Унинг сўзларига кўра, вазирлик «австралияликларга Украинани зудлик билан тарк этишни маслаҳат беришда давом этмоқда».

Австралия бош вазири Скотт Моррисон матбуот анжуманида вазият «жуда хавфли босқичга етганини» айтди. Шу билан бирга, у Хитойни Россия ҳаракатларига жавоб бермаётганликда айблади.

«Хитой ҳукумати Австралияни танқид қилишдан завқланади, бироқ у Украина чегарасида Россия қўшинларининг тўпланиши ҳақида хавотирли сукут сақламоқда», — деди Моррисон.

Шунингдек, Канада ҳам Россия-Украина чегарасидаги кескинлик туфайли ўз элчихонасини вақтинча Киевдан Львовга кўчирмоқда. Бу ҳақда Канада ташқи ишлар вазири Мелани Жоли Twitter’да ёзган.

«Хавфсизлик билан боғлиқ вазият ёмонлашишда давом этаётганини ҳисобга олиб, фаолиятимизни вақтинчалик Львовдаги идорада олиб борамиз ва Киевдаги элчихонамиз фаолиятини вақтинча тўхтатамиз», — дейилади баёнотда.

Унинг қўшимча қилишича, Канада Украинадаги дипломатик иштирокини давом эттиради.

Сўнгги кунларда АҚШ ва унинг иттифоқчилари Россия Украина ҳудудига ҳарбий босқин тайёрлаяпти, деган хавотирлар фонида кўплаб давлатлар Украинадаги дипломатик иштирокини қисқартиришга уринмоқда. 2021 йилнинг кузидан бери ғарб Украина билан чегаралар яқинида Россия қўшинлари тўплангани ҳақида хабар бермоқда.

12 февраль куни АҚШ давлат котиби Энтони Блинкен Россиянинг Украинага босқини исталган вақтда, жумладан, Пекиндаги Олимпиада ўйинлари якунлангунига қадар бошланиши мумкинлигини айтди. Россия ташқи ишлар вазирлигининг расмий вакили Мария Захарова ўзининг Telegram’даги канали орқали Америка ҳукуматининг баёнотини «жазавага тушиш» деб атади.

Аввалроқ Нидерландия, Черногория, Япония ва Жанубий Корея ўз фуқароларига Украинага бормасликни тавсия қилди ва у ерда бўлганлардан мамлакатдан чиқиб кетишни сўраганди. 10 февралда АҚШ давлат департаменти фуқароларга Украинага бормаслик ёки зудлик билан Россия ҳарбий ҳаракатлари хавфи бўлган ва COVID-19 билан касалланишлар кўпайган ҳудуддан кетишни тавсия этган. АҚШ президенти Жо Байден Украинадаги барча америкаликлардан ҳозироқ мамлакатдан кетишни сўраган.